Кабрынчанін паказаў падводны свет азёраў Беларусі
10- 1.09.2024, 18:58
- 9,322
![Кабрынчанін паказаў падводны свет азёраў Беларусі](https://i.c97.org/ai/609056/aux-head-1725206302-20240901_kirill_kuleshov_360.jpg)
Чароўнае відэа.
Кабрынчанін Кірыл Куляшоў ужо больш за 20 гадоў захапляецца падводным паляваннем. Мужчына не ставіць за мэту здабыць як мага больш рыбы – ён атрымлівае асалоду ад прыгажосці прыроды і самога працэсу, здымае свае падводныя прыгоды на камеру і дзеліцца ўражаннямі, піша kobrincity.by.
Спачатку падводны свет дарыў замест улову адрэналін
«З ранняга дзяцінства бацька і дзядулі бралі мяне з сабой на рыбалку – увесь вольны час я праводзіў на вадаёмах. У 12 гадоў пачаў лавіць ракаў на кар'ерах за Малымі Ляпесамі, ныраючы з маскай, трубкай і ў ластах. У 2000-м годзе бацька з камандзіроўкі прывёз падводную стрэльбу. Тады я і захварэў на падводнае паляванне» – дзеліцца Кірыл пачаткам свайго станаўлення як падводнага паляўнічага.
Спачатку малады «падвох» часта заставаўся без рыбы, але падводны свет Кобрыншчыны вабіў і дарыў адрэналін.
Уражанні захоплівалі дух і Кірыл надумаў запісваць падводны свет на відэа, каб дзяліцца сваімі эмоцыямі – набыў камеру і завёў свой ютуб-канал.
Бачнасць на Мухаўцы невялікая – плывеш, бывае, амаль навобмацак
«Першыя апусканні не прыносілі ўлову, затое падводны мір зачароўваў і дарыў велізарнае задавальненне ад простага сузірання. З гадамі я набраўся досведу і навучыўся здабываць рыбу. Большасць думае, што гэта проста – зайшоў у ваду, абраў рыбу, стрэліў і ўсё, але гэта далёка не так. Падводнае паляванне патрабуе фізічнага здароўя, цягавітасці і цярпення. Часта такі промысел мог доўжыцца 5-6 гадзінаў і быць безвыніковым. Здабываючы судака, даводзіцца месцамі ныраць на глыбіню ад 4 да 9 метраў у заваленае дрэвамі і галінкамі дно – менавіта там яны і жывуць. На дне цемра і бачнасць на Мухаўцы невялікая – плывеш, бывае, амаль навобмацак», – апавядае падводны паляўнічы.
Мухавец, Каташы, Браслаўскія азёры і нават Чорнае мора
«Цяпер палюю нашмат радзей, з 2022 года практычна ўсе вадаёмы ў Берасцейскай вобласці патрапілі пад забарону для палявання. А там, дзе дазволенае падводнае паляванне, адсутнічае празрыстасць вады, ды і месцаў у спісе вельмі мала. Аднак я кожны год плачу ўнёскі і знаходжуся ў Беларускім таварыстве паляўнічых і рыбаловаў. Для занятку падводным паляваннем трэба мець пасведчанне БТПР і падводнага паляўнічага, абавязкова аплачаныя. Без іх паляваць нельга.
Да забароны паляваць можна было ўсюды. Паляваў на Браслаўскіх азёрах, старым Мухаўцы, новым Мухаўцы, Днепрабугскім канале, на азёрах у Берасці, Олтушы, Лукаўскім, Каташы, Сонечным, Беліне і шмат розных невялікіх рачулак і вадаёмаў без назваў – усе і не ўспомніць. Нядаўна паляваў у Чорным моры і застаўся без рыбы, там таксама трэба мець досвед, але для мяне галоўнае сам працэс», – адзначае Кірыл.
У прыроды трэба не толькі браць, але і аддаваць
«Падводнае паляванне для мяне – гэта хобі, спорт, забаўка, заўсёды новыя і незабыўныя ўражанні і магчымасць, вядома, здабыць рыбу, якую я вельмі люблю есці са сваёй сям'ёй. Кожны раз, заходзячы ў ваду, адчуваю, як у першы раз, невялікую трывогу і нават, мусіць, невялікі страх. Шмат гадоў займаюся, а прывыкнуць немагчыма – заўсёды ўсё нешта новае.
Чысціня вады з кожным годам становіцца горшай, рыбы меншыя і ў многіх месцах зніклі ракі. Шмат смецця на беразе і нават на дне, якое я заўсёды прыбіраю ў сілу сваіх магчымасцяў. Бывае, прыбярэш, прыедзеш праз два тыдні, а там яшчэ больш смецця.
![](https://i.c97.org/ai/609056/aux-1725206200-podvodnaya_rybalka08.jpg)
Бывае магчымасць набраць шмат рыбы, але я заўсёды браў і бяру столькі, колькі мне трэба на вячэру ці абед. Хачу, каб дзеці, унукі і праўнукі яшчэ лавілі, а калі так выбіваць і гэтак жа на вуды, спінінгі, фідары лавіць, то што застанецца?» – падкрэслівае суразмоўца.
![](https://i.c97.org/ai/609056/aux-1725206200-podvodnaya_rybalka06.jpg)
Пад вадой я ў іншым свеце – праблемы засталіся дзесьці на беразе
«За ўсе гады здабыў нямала трафеяў, гэта і белы амур, карп, судак, шчупак, лін, язь, акунь, самоў вялікіх не трапілася, максімальны 9 кг. Але самы каштоўны для мяне карася вагой 4 кг 150 грам – які ён быў смачны!
Пад вадой я ў іншым свеце, дзе спадзяешся толькі на сябе і няма вакол нікога і нічога. Цалкам адрываюся ад усіх праблемаў, справаў, працы, якія засталіся дзесьці на беразе», – заканчвае гутарку Кірыл.
![](https://i.c97.org/ai/609056/aux-1725206200-podvodnaya_rybalka02.jpg)
![](https://i.c97.org/ai/609056/aux-1725206200-podvodnaya_rybalka04.jpg)
![](https://i.c97.org/ai/609056/aux-1725206200-podvodnaya_rybalka01.jpg)
![](https://i.c97.org/ai/609056/aux-1725206200-podvodnaya_rybalka03.jpg)