Урад Вялікай Брытаніі абяцае новы закон для ўзмацнення правоў супрацоўнікаў
- 1.09.2024, 20:28
- 1,106
![Урад Вялікай Брытаніі абяцае новы закон для ўзмацнення правоў супрацоўнікаў](https://i.c97.org/p/articles/2015/ai-150199-aux-head-2015050505_anglija_new_360_t.jpg)
Прадугледжаны шэраг зменаў.
Лейбарысцкая партыя Брытаніі абвясціла пра планы прапанаваць найбольш «насычаны заканадаўчы парадак дня» для новага ўраду за апошнія дзесяцігоддзі, уключаючы прыняцце восенню законаў, накіраваных на паляпшэнне правоў супрацоўнікаў і большую абарону арандатараў жылля, паведамляе Reuters.
Паколькі парламент павінен вярнуцца з летніх вакацыяў у панядзелак, лідарка Палаты супольнасцяў Люсі Паўэл заявіла, што цягам наступных некалькіх месяцаў урад увядзе заканадаўства, закліканае перадаць уладу ад працадаўцаў да супрацоўнікаў і дазволіць арандатарам аспрэчваць неабгрунтаванае павышэнне арэнднай платы.
Законапраект аб правах наёмных супрацоўнікаў забароніць кантракты з нулявой аплатай працы – блізу 1 мільёна чалавек у Брытаніі маюць працоўныя кантракты, дзе не пазначаная мінімальная колькасць гадзінаў, якія яны могуць адпрацаваць і якія аплачваюцца толькі за гадзіны, адпрацаваныя на змене, а таксама забароніць тактыку звальнення і паўторнага найму.
Законапраект аб правах арандатараў ліквідуе пагрозу адвольных высяленняў і забароніць арэндадаўцам дыскрымінаваць сем'і з дзецьмі.
На наступным тыдні ўрад таксама плануе прыняць закон аб паступовай рэнацыяналізацыі сеткі пасажырскіх чыгунак і ўзмацненні ролі афіцыйнага кантралёра бюджэту краіны.
У чацвер у Палаце супольнасцяў заканадаўцы атрымаюць першую магчымасць абмеркаваць законапраект аб брытанскай энэргетыцы, які прадугледжвае стварэнне дзяржаўнай кампаніі з капіталам 8,3 млрд фунтаў стэрлінгаў ($10,89 млрд) для супольнага інвеставання ў зялёныя тэхналогіі.
«Новы лейбарысцкі ўрад поўны энэргіі, ідэй і імкнення выканаць наш мандат на змены. Менавіта таму мы абвясцілі пра насычаны заканадаўчы парадак дня», – сказала Паўэл.
Цягам наступных некалькіх месяцаў урад таксама плануе ўвесці заканадаўства, якое зробіць больш жорсткімі правілы сумяшчальніцтва для заканадаўцаў і змусіць да персанальнай крымінальнай адказнасці кіраўнікоў водаканалаў, калі іх кампаніі неаднаразова будуць парушаць правілы ачысткі сцёкавых водаў.