У Слуцку раптам масава абвугліліся шыльды

Фотафакт.

Жыхары Слуцку адзначаюць дзіўныя здарэнні з шыльдамі ў сваім горадзе: яны раптоўна масава счарнелі, нібы «згарэлі», – нават тыя, якім шмат гадоў. Выказалі версію, што гэта праз уздзеянне ультрафіялету. Ці так гэта насамрэч, парталу SlutskGorod расказалі ў Нацыянальным навукова-даследчым цэнтры маніторынгу азонасферы (ННДЦ МА) БДУ.

Журналісты партала звярнулі ўвагу, што з паўднёвага боку стэлы «Слуцк – 1005» хутка абвугліўся герб горада, быццам яго нехта падпаліў. Хоць гэтай кампазіцыі ўжо шмат гадоў.

У сацсетках случчакі выказалі здагадку, што гэта ўплыў сонечных прамянёў, і расказалі, што за апошні час ад ультрафіялету пацярпелі многія шыльды, прычым у іншых гарадах таксама:

«Сонца. У мяне ўсе стэнды на будынку такімі сталі».

«Гэта фотадрук. Звярніце ўвагу на шыльды былой “Камунаркі”, “Крыніцы” – ад ультрафіялету яны чарнеюць».

«У нас на машыне рэкламныя налепкі згарэлі, давялося здымаць. Дзяўчына, якая рабіла іх, сказала, што ад сонца і спякоты».

«Таксама за апошні месяц згарэла налепка на “Еўраопце” на М. Багдановіча. Звярнула ўвагу, што на суседнім будынку літаральна за 4 дні налепка стала чорнай».

«Вельмі шмат шыльдаў па горадзе ў такім стане».

«У мяне на шынамантажы таксама выгарала шыльдачка. Гэтулькі гадоў вісела, і нічога, а тут за пару тыдняў выгарала».

«Нашыя шыльды згарэлі ў Слуцку, Жлобіне, Гомелі, Асіповічах. Віселі шмат гадоў, сетка па ўсёй РБ, а сёлета рэзка сапсаваліся».

Яшчэ адна случчанка адзначыла, што за апошнія гады пакутавалі многія шыльды на прадпрыемствах горада, з'ява гэтая не новая і з ёй добра знаёмыя спецыялісты ў вырабе вонкавай рэкламы.

Ці з'яўляецца тое, што адбываецца з паліграфіяй у Слуцку, своеасаблівым індыкатарам агрэсіўнага ультрафіялету? Ці можа гэта ўскосна сведчыць пра дзіравы азонавы пласт?

Звесткі з адкрытых крыніцаў кажуць, што, напрыклад, у панядзелак, 9 верасня, ультрафіялетавы (УФ) індэкс дасягаў 5 – гэта верхняя мяжа памяркоўнага выпраменьвання, далей ідзе высокае і небяспечнае.

Па каментар партал звярнуўся ў Нацыянальны навукова-даследчы цэнтр маніторынгу азонасферы (ННДЦ МА) БДУ. У сутнасці там пацвердзілі версію пра агрэсіўнае ўздзеянне ультрафіялету, адзначыўшы пры гэтым некалькі важных чыннікаў.

Паводле словаў чальца вучонай рады ННДЦ МА, дацэнта, кандыдата фізіка-матэматычных навук Аляксандра Светашава, азонавых дзірак над Беларуссю не фіксавалася. Разам з тым УФ-індэкс залежыць ад трох прычынаў: ад кута сонечных прамянёў, воблачнасці і так – ад утрымання азону ў верхніх пластах атмасферы.

«Хоць азонавы пласт крыху меншы за звычайны, у цэлым ён у межах нормы», – паведаміў навуковец.

У ННДЦ заўважылі, што нестабільнасць атмасферы звычайна назіраецца вясной, і ў гэтым годзе УФ-індэксы даходзілі да небяспечнага значэння 6 адзінак, у асноўным гэта было ў пачатку і ў сярэдзіне лета. Аднак і за мінулы тыдзень індэкс даходзіў да пяці, «таму што не было аблокаў». І ў такія моманты на адкрытым сонцы лепш насіць закрытае адзенне і сонцаахоўныя акуляры.

Аляксандр Светашоў дадаў, што ўздзеянне ультрафіялету на чалавека мае збіральны эфект. Што да здароўя людзей, уздзеянне пачынаецца ад эрытэмаў (лакальныя пачырваненні) і сканчаецца пашкоджаннем структуры ДНК у выпадку высокага УФ-індэксу і доўгага знаходжання на сонцы. Да нейкага этапу з разбуранымі клеткамі спраўляецца імунная сістэма – тут усё залежыць ад агульнай нагрузкі на імунітэт і індывідуальных асаблівасцяў арганізма.

Так ці інакш, мае месца эфект назапашвання сонечнага ўздзеяння за гады. Людзі, якія ў маладосці шмат знаходзіліся на сонцы, ва ўзросце часцей пакутуюць ад меланомы і іншых захворванняў. І, нягледзячы на тое, што сонечная радыяцыя не пранікае глыбока ў тканкі, ёсць негатыўныя механізмы, якія таксама могуць выявіцца на здароўі з часам. Падобным чынам збіраюцца разбурэнні ў пластмасе ці ў паліграфічнай прадукцыі.

Дацэнт таксама адзначыў цікавы факт: у сонцаахоўных акулярах у чалавека рэфлекторна пашыраецца зрэнка, каб прымаць больш святла. Пры гэтым шматлікія акуляры, нават дарагія, насамрэч не абараняюць ад ультрафіялету ці абараняюць толькі часткова. Тым больш, большасць відаў пластмасы не затрымлівае ультрафіялет.

І атрымліваецца, што вобласць пашкоджання сятчаткі сонцам у акулярах толькі павялічваецца. На практыцы акуляры можна праверыць толькі праз спецыяльныя прыборы альбо трэба набываць толькі сертыфікаваную ў Беларусі прадукцыю.

«Мы правяралі акуляры жанчыны за 300 даляраў, дык яны прапускалі 60% УФ. Так што кошт – гэта яшчэ не заўсёды паказнік абароны ад сонца», – дадаў навуковец.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com