Сіноптыкі патлумачылі, чаму ў Менску стаіць смог з гарам і калі гэта скончыцца
6- 11.09.2024, 21:43
- 6,656
![Сіноптыкі патлумачылі, чаму ў Менску стаіць смог з гарам і калі гэта скончыцца](https://i.c97.org/ai/609882/aux-head-1725787084-20240908_minsk_smog_360.jpg)
Вольна ўздыхнуць змогуць не ўсе.
Менчукі прадаўжаюць скардзіцца на неба ў імзе і пах гару. Сітуацыю пракаментавалі ў Белгідрамеце – спецыялісты расказалі, што такая з'ява тлумачыцца адсутнасцю дажджоў і ляснымі пажарамі. Аднак хутка месцамі па краіне пройдуць дажджы і прынамсі часткова выправяць сітуацыю, піша БелТА.
У Белгідрамеце адзначылі, што маніторынг стану атмасфернага паветра праводзіцца ўвесь час, а інфармацыю пра яго можна знайсці ў адкрытым доступе на сайце.
«Паводле звестак бесперапынных вымярэнняў на аўтаматычных станцыях перавышэнняў памежна дапушчальных канцэнтрацый забруджвальных рэчываў у атмасферным паветры ў Менску 11 верасня не зафіксавана. Асноўнай прычынай паху гару ў населеных пунктах краіны можа з'яўляцца перанос дымоў пажараў у экасістэмах (лясныя пажары, пажары травы і кустоў і інш.)», – расказалі спецыялісты.
У Рэспубліканскім цэнтры гідраметэаралогіі, кантролю радыеактыўнага забруджвання і маніторынгу навакольнага асяроддзя Мінпрыроды звярнулі ўвагу, што ў Беларусі з пачатку каляндарнай восені ўтрымліваецца антыцыклональны характар надвор'я. Паветраныя плыні з поўдня, паўднёвага ўсходу выносяць у краіну сухое і цёплае паветра.
«Так, за першую дэкаду верасня месцамі, а па Гомельскай, Магілёўскай, паўднёвым усходзе Берасцейскай вобласці ў шмат якіх раёнах ападкаў практычна не было. Там адзначаецца небяспечная з'ява – надзвычайная пажарная небяспека. У Менску з пачатку верасня выпаў толькі 1 адсотак ад дэкаднай нормы ападкаў. Адсутнасць зонаў ападкаў, якія маглі б укладваць узважаныя часцінкі пылу і гару, і пры наяўнасці гару ад загаранняў (асабліва па паўднёвым усходзе краіны) паўднёва-ўсходнімі вятрамі выносіцца ўглыб краіны», – расказалі ў Белгідрамеце.
Спецыялісты дадалі, што спыніцца такая сітуацыя з праходжаннем сярэдніх і моцных дажджоў па ўсёй Беларусі.
«У найбліжэйшыя дні франтальныя раздзелы, уплыў якіх чакаецца ўжо ў чацвер і пятніцу, крыху палепшаць сітуацыю ў краіне. Аднак у шэрагу раёнаў (асабліва па ўсходзе краіны) будзе назірацца дэфіцыт ападкаў, а значыць, пажарная небяспека захаваецца», – адзначылі ў Белгідрамеце.
Нагадаем, раніцай 11 верасня ў МНС паведамілі, што ніякіх пажараў або іншых надзвычайных здарэнняў, здольных выклікаць смог і пах гару, у сталіцы не адбываецца.
Між тым сіноптыкі абвясцілі на 11–12 верасня чырвоны ўзровень небяспекі ў трох абласцях (Гомельскай, Магілёўскай і Берасцейскай) праз надзвычайную пажарную небяспеку.