Кошт расейскай нафты абрынуўся ніжэй за «болевы парог» бюджэту РФ
5- 12.09.2024, 20:24
- 11,704
![Кошт расейскай нафты абрынуўся ніжэй за «болевы парог» бюджэту РФ](https://i.c97.org/ai/520644/aux-head-1666208258-20221019_oil_rus_360.jpg)
За два тыдні расейская нафта патаннела на 18%.
Над расейскім бюджэтам, які на траціну напаўняецца прыбыткамі ад продажу вуглевадародаў, пачалі згушчацца нафтавыя хмары.
Крах сусветных коштаў нафты ў верасні, які апусціў кошт бараля Brent да мінімуму з канца 2021 года, пацягнуў за сабой каціроўкі расейскага гатунку Urals і апусціў прыбыткі нафтавых кампаній.
Як паведамляе Bloomberg, у пачатку тыдня кошт нафты РФ у партах Балтыйскага мора ўпершыню з пачатку года апускаўся ніжэй за адзнаку $ 60 за бараль. У Прыморску і Усць-Лугу ў аўторак, 10 верасня, Urals прадавалі за $57,44 за бараль і $57,79 за бочку адпаведна. Кошты ў Новарасійску трымаліся крыху вышэй – $ 60,33 за бараль, паводле звестак Reuters.
За два тыдні расейская нафта патаннела на $12,7, ці 18%. А яе цяперашнія ўзроўні – блізу $ 60 за бараль – «дакладна з'яўляюцца не камфортнымі для федэральнага бюджэту», пішуць аналітыкі Расбанка. Праект казны на гэты год Мінфін вярстаў з разліку, што Urals будзе каштаваць $ 70 – гэта значыць, прыкладна на 17% даражэй, чым цяпер. Прыкладна такі самы кошт – $ 69,7 за бараль – Мінэканамразвіцця заклала ў праектаванне для бюджэту-2025.
Нафтавы крах абяцае бюджэту праблемы, папярэджвае Яўген Сувораў, эканаміст банка Цэнтракрэдыт. Каб кампенсаваць выпадзенне прыбыткаў, згодна з бюджэтным правілам, урад павінен задзейнічаць Фонд нацыянальнага дабрабыту. Але ў ім засталося ўсяго 4,8 трлн рублёў ліквідных, гэта значыць, не выдаткаваных сродкаў, з якіх 1,3 трлн ужо зарэзерваваныя пад выдаткі ў снежні, паказвае Сувораў: «Што будзе рабіць урад у сітуацыі, якая склалася, вялікая загадка». З пачатку вайны «ліквідная» падушка ФНБ садзьмулася практычна ўдвая.
Пакуль бюджэт не адчувае болю: у жніўні ён атрымаў прафіцыт на 767 млрд рублёў, а назапашаным вынікам за 8 месяцаў ягоны дэфіцыт склаў толькі адну шостую ад гадавога плану – 331 млрд рублёў з 2,1 трлн. Аднак нафтагазавыя прыбыткі ў жніўні – 768 млрд рублёў – на 28% ніжэйшыя за ліпеньскія і на 20% ніжэйшыя за сярэдні ўзровень за папярэднія 7 месяцаў.
Выручка Расеі ад продажу нафты і газу, паводле звестак Міжнароднага энэргетычнага агенцтва, скарацілася ў жніўні на $1,6 млрд, да $15,3 млрд і стала самай нізкай за год. Нават калі кошты нафты стабілізуюцца блізу $60, бюджэту будзе некамфортна «праз высокія выдаткі на СВА», піша Расбанк: войска і набыццё зброі абыдуцца казне сёлета на 10,8 рублёў, ці амаль 30% усіх выдаткаў – рэкордную дзель са часоў СССР.
Асобнай праблемай стане бюджэт наступнага года, указвае інвестбанкір Яўген Коган: першапачаткова Мінфін планаваў скарачэнне ваенных выдаткаў на 2,3 трлн рублёў. Але «сёння ў такое верыцца з цяжкасцю», адзначае Коган: калі дзель ваенных выдаткаў у эканоміцы застанецца на цяперашнім узроўні, спатрэбяцца дадатковыя 3,3 трлн рублёў, а яшчэ 1,4 трлн руб трэба для выканання травеньскіх указаў Уладзіміра Пуціна.
З нафтай ніжэйшай за $70 ФНБ будзе хутка вычэрпвацца, папярэджвае Коган: «І верагоднасць гэтага зусім не малая».