«Зяленскі папярэдзіў Лукашэнку»

Што стаіць за словамі ўкраінскага прэзідэнта аб Беларусі.

На днях прэзідэнт Украіны Уладзімір Зяленскі на прэс-канферэнцыі з літоўскім калегам Гітанасам Наўседам пацвердзіў, што расейскія войскі пачалі контрнаступ у Курскай вобласці, а таксама згадаў Беларусь.

«Расейцы распачалі контрнаступальныя дзеянні. Усё ідзе паводле нашага ўкраінскага плана. Што да Беларусі. Збой войск бачым. Бачым даўно. Кантралюем гэты працэс», - заявіў Зяленскі.

Што стаіць за гэтымі словамі кіраўніка Украіны? Пра гэта сайт Charter97.org пагаварыў з кандыдатам філасофскіх навук, кіраўніком украінскага Цэнтра беларускіх камунікацый Максімам Плешкам:

- Я бачу тут тры адрасаты: гэта і папярэджанне беларускіх уладаў, і сігнал украінскаму грамадству (бачым і кантралюем сітуацыю), і сігнал міжнародным партнёрам.

Украіна не толькі бачыць канцэнтрацыю войск на мяжы, але і ведае, што беларускае войска даўным-даўно спустошыла свае склады боепрыпасаў, аддаўшы іх Расеі. Яны адпраўленыя на франты ўкраінскага Усходу і Поўдня. Таксама і большая частка тэхнікі беларускага войска была перададзеная РФ.

Мы выдатна разумеем, што і беларускія вайскоўцы, і народ не жадаюць ваяваць з Украінай. Не бачаць у гэтым сэнсу і запатрабавання. Таму мы спакойна рэагуем на гэта.

Ва Украіне агулам зараз дамінуе настрой: менш казаць і спакойна ўспрымаць. Ведаеце, мы за апошнія гады столькі ўсяго перажылі, што імкнёмся рэагаваць спакойна. Гэта штатная сітуацыя.

На паўночнай мяжы Украіны (дзе ёсць збой беларускіх узброеных сіл) і на іншых адрэзках даўно маюцца замінаваныя, умацаваныя тэрыторыі. Там размешчаныя падраздзяленні, якія перыядычна мяняюць. Калі на беларускай тэрыторыі недзе збіраецца войска, то і з боку Украіны таксама збіраецца, але мы проста пра гэта не гаворым. Але яно ёсць, гатовае ахоўваць мяжу.

Падкрэслю, мы ведаем, што беларусы і войска не жадаюць ваяваць супраць Украіны. Беларуская ўлада, Мінабароны і іншыя структуры таксама ведаюць, што ў выпадку ўступлення Беларусі ў гэтую авантуру Пуціна, зараз рэакцыя будзе іншай, чым у 2022-м.

Тады Украіна ўстрымалася, выцершы кроў. Сёння ж ва Украіны ёсць дастаткова сіл і сродкаў, каб дастаць усё, што заўгодна і дзе заўгодна. Калі дроны ўжо далятаюць да Урала, то месцы беларускага ВПК цалкам у зоне дасяжнасці. Больш за тое, беларускія вайскоўцы таксама разумеюць, што прымежныя гарады беларускага Поўдня (Гомель, Рэчыца і гэтак далей) вельмі блізкія да ўкраінскай мяжы.

Мы ж разумеем значэнне Мазырскага НПЗ, а ён у дасяжнасці нават ствольнай артылерыі Украіны. Лукашэнка таксама гэта цудоўна разумее і баіцца.

Я асабіста спадзяюся, што ўсе гэтыя моманты пройдуць, расейская імперыя разваліцца і ва Украіны будуць нармальныя, партнёрскія дачыненні з Беларуссю.

Але ёсць іншая пагроза. Калі зноў будуць нейкія вучэнні, расейскія войскі зноў прыйдуць у Беларусь, то беларуская ўлада іх не пракантралюе, яны могуць пайсці на правакацыі. Тады Украіна будзе вымушаная адказаць.

Вялікай пагрозай для бяспекі Беларусі на гэты момант ёсць з'яўленне на яе тэрыторыі расейскіх войск.

- У Беларусі акурат плануюцца вучэнні супольнай з РФ Рэгіянальнай групоўкі войск.

- Да гэтага я і вяду. Вы правільна зразумелі. Гэта дастаткова рызыкоўная сітуацыя. Калі з'явіцца вялікая колькасць вайсковай тэхнікі, узбраенняў, яна будзе ехаць па чыгунцы. Гэта немагчыма схаваць у цяперашніх умовах.

У інтарэсах усёй Беларусі ствараць агульны настрой, што расейскіх войск ёй не трэба. Лукашэнка - «сябар» галоўнага агрэсара свету, над Беларуссю лётаюць беспілотнікі, запушчаны сіламі Расеі, якія Беларусь не кантралюе.

Што тычыцца рыторыкі пра ядзерную зброю і «якія мы моцныя», то няхай прапагандысты Лукашэнкі крыху ўключаць мозг і зразумеюць, што калі ў вас размешчаная такая зброя і, не дай Бог, там нехта заварушыцца, туды ж у першую чаргу і прыляціць.

Беларусі не патрэбны новы Чарнобыль і новыя катастрофы. Лукашэнка ж стварае сітуацыю, калі ён, як я казаў вам у інтэрв'ю раней, як шакал Табакі бегае каля Шэр-Хана. Ён падстаўляе Беларусь пад санкцыі, пад праблемы, пад удар. Беларусь — вайсковая цэль, дзе размешчаныя арсеналы, у тым ліку ядзерныя. Чым бліжэй Беларусь да РФ, тым большая пагроза ўцягвання Беларусі ў непатрэбную для яе вайну.

- Ці ўплывае неяк сітуацыя ў Курскай вобласці на Лукашэнку? Калі спраецыраваць гэтую сітуацыю на Беларусь, то ці будзе Пуцін абараняць яго?

- У гэты момант Пуцін сябе не можа абараніць. Як ён зможа абараніць Лукашэнку? Сітуацыя ў Курскай вобласці вельмі паказальная і паўплывала на Беларусь і ўладу. Лукашэнка і ягонае асяроддзе вельмі занерваваліся. Яны зразумелі, што застануцца сам-насам. Пачалі праводзіць і «вучэнні», і паказуху, і гэтак далей. Мы з вамі цягам апошніх гадоў размаўлялі (і гэта супадае з тым, што кажуць беларускія добраахвотнікі на фронце), што вызваленне Беларусі адбудзецца праз перамогу Украіны.

Мы бачым сітуацыю ў Курскай вобласці, калі ў Расеі пачалася нестабільнасць, а мы з вамі яшчэ заспеем, калі ў РФ пачнуцца ўнутраныя войны. Рымская імперыя распадалася некалькі стагоддзяў. Расейская ж імперыя распадаецца з пачатку 90-х, і зараз адна з актыўных фаз.

Яна спрабавала сябе аднавіць, але ўсё прыйшло да таго, што яна рассыпаецца. І Курская вобласць - гэта першы такі сігнал, спроба таго, што будзе ў перспектыве. Таму, падкрэслю, Пуцін Лукашэнку не абароніць. Ён сябе не можа абараніць.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com