«Беларускі генерал» ЦАХАЛ ездзіў у Маскву на перамовы
- 2.09.2024, 11:48
- 5,336
![«Беларускі генерал» ЦАХАЛ ездзіў у Маскву на перамовы](https://i.c97.org/ai/609124/aux-head-1725266896-20240902_roman_gofman_360.jpg)
Расея аб перамовах не паведамляла.
Вайсковы сакратар прэм'ер-міністра Ізраілю, генерал Раман Гофман днямі быў у Маскве, каб абмеркаваць «прасоўванне ў дамове» наконт закладнікаў у сектары Газа.
Пра гэтую паездку распавёў Біньямін Нэтаньяху, маючы стасункі з Аксанай і Рыгорам Лабанавымі - бацькамі 32-гадовага Аляксандра Лабанава. Яго цела, а таксама целы яшчэ пяці закладнікаў знайшлі ў сектары Газа 1 верасня. У Лабанава было грамадзянства Расеі.
Масква аб візіце дарадцы прэм'ер-міністра Ізраілю не паведамляла.
Канцылярыя прэм'ер-міністра паведамляе, што Гофман 1 верасня вярнуўся з Масквы.
Раман Гофман з'яўляецца першым прадстаўніком «вялікай аліі», які атрымаў генеральскае званне ў ЦАХАЛе.
Раман родам з Мазыра, у 1995 годзе прызваны ў танкавыя войскі, прайшоў шлях ад шарагоўца да палкоўніка. Браў удзел у баявых дзеяннях у Паўднёвым Лібане, у аперацыі «Ахоўная сцяна», у Другой Лібанскай вайне, а таксама ў аперацыях у сектары Газа.
Займаў пасады камандзіра танка, камандзіра танкавага аддзялення, камандзіра ўзвода. Узначальваў танкавы аддзел у цэнтры агнявой падрыхтоўкі.
Падчас атакі ХАМАС у кастрычніку 2023 года ён быў цяжка паранены.