Хлопчык у Менску выйграў iPhone ў аўтамаце, але ў каробцы апынулася шакаладка
30- 3.09.2024, 19:05
- 16,944
![Хлопчык у Менску выйграў iPhone ў аўтамаце, але ў каробцы апынулася шакаладка](https://i.c97.org/ai/609321/aux-head-1725379185-20240101_miacz_360.jpg)
Яшчэ і з цвіллю.
Дзіця ў Менску выйграла ў вендынгавым апараце каробку з надпісам iPhone і падумала, што яму дастаўся каштоўны прыз, але яго чакаў непрыемны сюрпрыз, паведамляе тэлеграм-канал «Минск. Главное!».
Калі малыш разам з татам распакавалі скрынку, то ўбачылі ў ёй расталую шакаладку, прычым з цвіллю ўнутры.
Бацька хлопчыка патэлефанаваў у службу падтрымкі аўтамата, на што яму запярэчылі, што ніхто не абяцаў, што там будзе тэлефон.
“А хто вам сказаў, што там будзе тэлефон? Там можа ляжаць што заўгодна, нават пустая скрынка», - адказалі мужчыну.
Тым часам уладальнік апарата заявіў, што дзіця ў мінусе не засталося, бо шакаладка нібыта каштуе 35 рублёў, а хлопчык выдаткаваў значна менш.
Летась падобная гісторыя адбылася з жыхаром Гомеля. Гамяльчук выдаткаваў усяго 2 рублі ў вендынгавым аўтамаце і выйграў iPhone. Калі ён распакаваў свой прыз, каробка выявілася пустой.
Пасля гэтага мужчыне прапанавалі грашовую кампенсацыю - 70 рублёў, праз пару дзён - 100, але ён адмовіўся. Пазней уладальнік вендынгавага аўтамата растлумачыў, што сапраўдны iPhone тут выйграць немагчыма, а тым, хто выцягнуў такі прыз, дораць звычайна кітайскія рэплікі.