Апублікаваны сакрэтны план верхаводаў ХАМАС
- 6.09.2024, 12:48
- 4,962
![Апублікаваны сакрэтны план верхаводаў ХАМАС](https://i.c97.org/ai/566957/aux-head-1696837529-20231009_hamas_360.jpg)
Ён датычыцца перамоваў з Ізраілем.
У распараджэнне BILD патрапіў дакумент, у якім ХАМАС выкладае сваю стратэгію вядзення перамоў. Дакумент быў знойдзены на кампутары, які меркавана належыць лідару тэрарыстаў Яхье Сінвару. мяркуецца, што ён асабіста ўхваліў яго змест. Ліст датуецца вясной 2024 года. Цынічная інструкцыя ХАМАС паказвае, наколькі тэрарысты абыякавыя да пакут мірных палестынцаў і не зацікаўленыя ў хуткім заканчэнні вайны.
ХАМАС пералічвае некалькі асноўных фактараў, якія павінны быць прынятыя да ўвагі падчас перамоў. Напрыклад, «здольнасць узброеных сіл» ХАМАС дзейнічаць супраць Ізраілю павінна быць захаваная. Палітычны і вайсковы апарат Ізраіля павінен быць «знясілены», а міжнародны ціск на Ізраіль «вычарпаны». Адзначаецца, што «важныя пункты пагаднення павінны быць палепшаныя, нават калі перамовы будуць прадаўжацца цягам доўгага часу». Хоць ХАМАС прызнае, што яго «вайсковы патэнцыял аслаблены», кіраўніцтва тэрарыстычнай арганізацыі не думае, што неабходна пагадзіцца на хуткае спыненне баявых дзеянняў, нягледзячы на гаротнае становішча насельніцтва Газы.
У дакуменце адкрыта заяўляецца: «Працягвайце псіхалагічны ціск на сем'і палонных, як зараз, так і на першым этапе [спынення агню], каб узмацніць грамадскі ціск на ўрад ворага». ХАМАС неаднаразова публікаваў відэа з закладнікамі, у якіх яны вымушаныя маліць аб вызваленні і крытыкаваць свой урад.
Нават падчас замірэння тэрарысты маюць намер выкарыстоўваць закладнікаў для ціску на Ізраіль «Падчас перамоў пра другую фазу [спынення агню] ХАМАС дазволіць прадстаўнікам Чырвонага Крыжа наведаць некаторых зняволеных у якасці жэсту добрай волі і перадаць пасланні іх сваякам», - гаворыцца ў дакуменце.
У дакуменце таксама пералічваюцца асноўныя патрабаванні, якія павінны быць выстаўленыя Ізраілю, напрыклад, вызваленне 100 забойцаў і тэрарыстаў, якія адбываюць пажыццёвае зняволенне.
Некалькі ключавых пунктаў дакумента прысвечаныя пытанню аб тым, як маніпуляваць міжнароднай супольнасцю і як аднавіць вайсковыя сілы ХАМАС. Гаворыцца пра «палітычны манеўр»: перамоўнікі ад ХАМАС павінны прапанаваць размясціць «арабскія сілы ўздоўж усходняй і паўночнай межаў» з Ізраілем. Аднак у іх будзе толькі адна мэта: «Арабскія сілы павінны служыць буферам, каб не дапусціць ворага ў Газу пасля заканчэння вайны, пакуль яны [ХАМАС] не рэарганізуюць свае шэрагі і вайсковы патэнцыял». Іншымі словамі, ХАМАС хоча падрыхтавацца да новых баявых дзеянняў пад прыкрыццём чужых войск.
Ізраіль павінен несці поўную адказнасць за няўдалыя перамовы, вынікае са стратэгіі ХАМАС. Паведамленні ХАМАС для СМІ павінны казаць аб тым, што Ізраіль адпрэчыў угоду, прапанаваную ЗША. Сродкам масавай інфармацыі павінна быць ясна, што ХАМАС пагадзіўся на ўгоду, але яна правалілася праз «упартасць» Ізраілю. ХАМАС «не павінен несці адказнасць за правал пагаднення», падкрэсліваецца ў дакуменце.