З менскай лякарні хуткай дапамогі выпісалі віцябчанку, якая моцна пацярпела пры пажары ў ГЦ

Жанчына была на працоўным месцы, калі пачаўся пажар.

З лякарні хуткай дапамогі ў Менску выпісалі жыхарку Віцебска Тацяну Казеку, якая моцна пацярпела пры пажары ў гандлёвым цэнтры ў абласным цэнтры 13 снежня. Жанчына расказала, як сябе адчувае цяпер, у сюжэце дзяржканала «Першы інфармацыйны».

Таццяна расказала, што была на працоўным месцы, калі пачаўся пажар. Жанчына збіралася паглядзець адкрыццё ялінкі пасля працы, але не паспела выйсці.

– Ужо пачаўся вакол дым. Па адной лесвіцы паспрабавала спусціцца, там ужо ўнізе агонь быў. На другія ўсходы паспрабавала прабегчы – там таксама доступ быў закрыты, было вельмі горача ўсё, – апісала яна той дзень.

Казеку падчас пажару выратавалі супрацоўнікі МНС. У цяжкім стане яе спачатку адвезлі ў Віцебскую абласную лякарню, а праз тыдзень на спецтранспарце даставілі ў Рэспубліканскі апёкавы цэнтр у Менск. Двое сутак жанчына знаходзілася без прытомнасці.

– Цяпер, вядома, я адчуваю ўжо, не настолькі, наколькі было гэта раней, але я адчуваю. Я дыхаю ўжо, – апісала сваё цяперашняе самаадчуванне Таццяна.

Паводле словаў галоўнай лекаркі сталічнай клінічнай лякарні хуткай дапамогі Вольгі Светліцкай, тэрмаінгаляцыйныя траўмы – частая прычына смерці пацярпелых пры пажарах. Яны могуць прывесці да смяротнага зыходу, нават калі чалавек не атрымаў апёкі.

– І [гэта] вельмі цяжкі абцяжарвальны чыннік любога адсотка апёкаў, якія здараюцца ў людзей, таму што ў такой сітуацыі пашкоджаныя лёгкія. Вось у гэтай пацыенткі, калі наша брыгада туды прыехала, там [у віцебскай лякарні] было больш за 10 чалавек, праводзілі бронхаскапію, хлопцы працавалі ўсю ноч, адмывалі – гэта значыць з дапамогай бронхаскопа выходзілі ў дыхальныя шляхі, дзе відаць пашкоджанні пасля пажару, голы налёт ад куродыму.

У сюжэце паведамілі, што віцябчанка прадоўжыць аднаўляцца ў Рэспубліканскай клінічнай лякарні медыцынскай рэабілітацыі.

Нагадаем, пажар у гандлёвым цэнтры «Беларусь» у Віцебску адбыўся 13 снежня. Ратавальнікі эвакуявалі больш за 200 чалавек, у тым ліку дзяцей. У лякарню даставілі 16 пацярпелых, уключаючы дваіх дзяцей, пазней па псіхалагічную дапамогу звярнуліся яшчэ чатыры чалавекі.

14 снежня Следчы камітэт пачаў крымінальную справу паводле ч. 2 ст. 304 КК, а 16-га сілавікі затрымалі першых падазраваных.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com