Перамога Украіны — гэта наш шанец змяніць лад у Беларусі

Як беларускія добраахвотнікі ваююць у Харкаўскай вобласці.

«Хартія» —13-я брыгада Нацыянальнай гвардыі Украіны зняла фільм, прысвечаны замежным добраахвотнікам, якія загінулі за Украіну. Галоўныя героі рэпартажу — беларусы, якія ваююць на поўнач ад Харкава ў мінамётным разліку.

«Расіяне бесперапынна абстрэльваюць пазіцыю артылерыяй, скідваюць FPV і дыстанцыйна замініруюць самаробнымі выбухоўкамі. Нягледзячы на ўсё, мінамётчыкі з Беларусі ўпарта ідуць да сваёй мэты — перамагчы Расію», — гаворыцца ў анонсе фільма.

Добраахвотнік з пазыўным «Месяц» распавёў, што яго арыштавалі за бел-чырвона-белую футболку на 30 сутак. У гэтай футболцы ён выйшаў на Дзень Волі.

Хлопец прыехаў ва Украіну напрыканцы 2022 года, у брыгадзе ён карэктуе мінамёты.

Жонка «Месяца» — валанцёрка, дапамагае Міжнароднаму легіёну. Яна кітайка.

— У Беларусі вельмі лёгка апынуцца ў турме па крымінальным артыкуле, — распавёў хлопец. — Маму майго добрага сябра арыштавалі на паўтара года за дызлайк у інтэрнэце, на YouTube.

У Беларусі арыштоўвалі беларусаў за беларускую мову. Бо лічыцца, што па-беларуску размаўляюць пераважна апазіцыянеры.

Добраахвотнік з пазыўным «Каралуг» прызнаецца, што вярнуцца на радзіму не можа: «Гэта будзе гадоў 20 у плечы ў турму як мінімум».

— У 2021 годзе лёс прымусіў пакінуць радзіму. Асноўная прычына — тое, што можна было пазнаёміцца з праваахоўнай сістэмай Беларусі знутры, — кажа мужчына.

Калі пачалася вайна ва Украіне, ён зразумеў, што адзіная магчымасць вярнуцца дадому і змяніць уладу на радзіме — адстойваць незалежнасць Украіны.

— Таму я і змагаюся тут за вашу і нашу свабоду, як бы банальна гэта ні гучала.

Добраахвотнік з пазыўным «Річ» распавёў, што прыехаў ва Украіну ў 2020 годзе, уцякаў ад улады. На той момант яму было 15 гадоў.

— Для мяне любы беларус тут — па сутнасці, свой брат, сястра. Абараняць іх — мой абавязак.

Хлопец не разглядае вяртанне ў Беларусь.

— Не хачу звязваць сваё жыццё з гэтай краінай. Яна зрабіла для мяне занадта шмат дрэннага, і, магчыма, я ніколі туды не вярнуся.

Свабода для яго — гэта магчымасць выбіраць свой шлях. Свабодным сябе ён не лічыць, бо цяпер у яго выбар без выбару: альбо забі, альбо будзеш забіты.

Тое, што ён быў дзіцём, калі пакінуў Беларусь, «Річ» тлумачыць:

— Такі рэжым не зважае на ўзрост, на палавую прыналежнасць, расу ці што-небудзь яшчэ. Ён лічыцца толькі з лаяльнасцю.

— Беларусы, якія тут знаходзяцца, — актыўныя людзі, якія нешта хочуць змяніць у гэтым свеце, — лічыць добраахвотнік з пазыўным «Сварог». — Я хачу перамогі Украіны, і ў прынцыпе гэта быў бы і наш шанец змяніць той лад, што існуе ў Беларусі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com