Чатырохгадовая беларуска са спісу Forbes пакарыла сацсеткі

Ева Карпікау зрабіла агляд беларускіх страў.

Еве Карпікау яшчэ няма і пяці гадоў. Але гэта не перашкодзіла дзяўчынцы сёлета трапіць у спіс Forbes самых перспектыўных блогераў. На яе блог у інстаграме, які вядзе мама, падпісана ўжо 1,2 мільёна чалавек. У тыктоку падпісчыкаў яшчэ больш — 2,1 мільёна.

Мама Евы з расійскага Урала, бацька — з беларускага Іўя. Але пазнаёміліся маладыя людзі ў Дубаі: бацька Астах жыў там з 17 гадоў, а мама Анастасія прыляцела туды працаваць у музычнай школе настаўніцай. Калі каханай трэба было вярнуцца на радзіму, Астах паляцеў за ёй — два гады маладая сям’я жыла ў Екацерынбургу. Але як толькі беларус атрымаў прапанову зноў працаваць у Дубаі, муж з жонкай з радасцю вярнуліся туды.

Пра тое, што дачку заўважыў Forbes, бацькі даведаліся са СМІ. Але праз гэта сям’я сутыкнулася і з хейтам: шмат хто паспеў дадумаць пра прыбыткі ў мільёны долараў. Анастасія ж кажа, што яны самая звычайная сям’я без понтаў і віл — і нават машына ў іх у крэдыт. А трапленне ў спіс Forbes сведчыць толькі пра тое, што яны ствараюць цікавы кантэнт.

Шчырасць і непасрэднасць Евы заваёўваюць сэрцы. Не мінула і сутак, а новае відэа, у якім юная лэдзі частуецца стравамі беларускай кухні і каментуе іх, набрала больш за 1,2 мільёна праглядаў, піша «Наша Ніва».

Адразу ёй прапанавалі дранікі — маленькая блогерка ела іх з апетытам.

— Першая страва проста шыкоўная! Можа, тут бульба такая смачная? Гэта я на мульцік пакіну, са сметанкай.

А вось халаднік энтузіязму не выклікаў. Ева насупілася, але лыжачку з’есці пагадзілася. Ацэнку дала тактычную: «Гэта не маё».

Бярозавік быў рэабілітаваны:

— Я ж раней піла, і мне не спадабалася. Можа, іншая бяроза?

Клёцкі атрымалі шчыры камплімент: «Аж за вушамі трэшчыць». А вось з калдунамі дзяўчынка не здолела вызначыцца — падабаюцца яны ёй ці не, але настойліва сказала тату: «Вынось!».

Калі Ева піла Лідскі квас, у яе быў такі выраз твару, што адразу стала зразумела: наўрад ці яна сама калі-небудзь папросіць у бацькоў купіць гэты напой.

Затое бабка сапраўды пакарыла фудблогерку:

— М-м-м, вось гэта смаката. Яшчэ раз укушу! Нават слоў няма.

Паляндвіцу Ева таксама адобрыла, а пальцам піханая каўбаса выклікала пытанні:

— Чым піханая? Якім пальцам? Тваім? Божа мой.

У выніку крытык прызнала, што вельмі смачна.

Беларусы ў каментарах пішуць дзяўчынцы словы захаплення і заміляюцца.

У сторыс мама паказала кадры, якія не ўвайшлі ў фінальнае відэа. Там Ева дзякуе тату па-беларуску. «Урокі бабулі па беларускай мове не прайшлі дарма», — напісала маці.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com