Ілон Маск запусціў Грокіпедыю

Энцыклапедыя заснаваная на ўяўленнях мільярдэра пра праўду пад кіраўніцтвам ШІ.

Для агульнага доступу адкрылася Грокіпедыя — анлайн-энцыклапедыя, якую мільярдэр Ілон Маск стварыў у супрацьвагу Вікіпедыі. Платформу павінны напаўняць людзі-энтузіясты, а мадэраваць — штучны інтэлект Grok, паведамляе The New York Times.

Зараз платформа працуе ў бэта-рэжыме, і на ёй размешчана да 900 000 параграфаў на розныя тэмы. У Вікіпедыі, якую напаўнялі 25 гадоў, цяпер амаль восем мільёнаў публікацый на розныя тэмы.

Ідэю стварыць уласную глабальную энцыклапедыю Маск агучыў у верасні. Спачатку Грокіпедыю планавалі запусціць да 20 кастрычніка. Але пасля кароткага тэставання распрацоўшчыкі раптоўна адключылі доступ да яе.

Ілон Маск заявіў у сваім профілі X: афіцыйны рэліз будзе адкладзены з-за таго, што ў вучальных даных штучнага інтэлекту занадта шмат «прапаганды». Урэшце 27 кастрычніка адбыўся рэліз.

У першыя гадзіны працы Грокіпедыя «лягла» з-за вялікай колькасці наведвальнікаў. Праз гадзіну паўнавартасную працу сайта аднавілі. Дызайн лаконічны: назва, светлая або цёмная тэма на выбар, радок пошуку для запытаў.

Журналісты The New York Times прааналізавалі, што цікавага Грокіпедыя піша на кантраверсійныя і неадназначныя тэмы. Ілона Маска сэрвіс вызначае так: «[Ён]... спалучае ў сабе інавацыйнага візіянера з дзёрзкім правакатарам». І дапаўняе вобраз яго харчовымі перавагамі, такімі як ранішнія пончыкі і дыетычная кола цягам дня.

У параграфе пра змену полу Грокіпедыя адзначае, што тэрапеўтычная падтрымка ў працэсе трансгендарнага пераходу грунтуецца на абмежаваных доказах нізкай якасці. Затое ў Вікіпедыі чытаем, што чалавецтва ўжо некалькі дзясяткаў гадоў таму прыйшло да навуковага разумення гэтага пытання.

Таксама Грокіпедыя змяшчае артыкул пра былога выканаўчага дырэктара Твітэра Парага Агравала (Parag Agrawal). Пасля таго, як Маск выкупіў сацсетку і перайменаваў яе ў X, ён часта публічна крытыкаваў свайго папярэдніка.

У артыкуле на Грокіпедыі падкрэсліваецца сцвярджэнне, якое неаднаразова агучваў Маск, — маўляў, Агравал не надаваў дастаткова ўвагі праблеме ботаў, фэйкавых і спам-уліковых запісаў. Сам Агравал сцвярджаў, што колькасць ботаў не перавышае 5% уліковых запісаў.

Даследчыкі спрабавалі часткова праверыць гэтыя заявы. У 2022 годзе навукоўцы з Каліфарнійскага ўніверсітэта і Інстытута інфармацыйных навук Паўднёвага Каліфарнійскага ўніверсітэта правялі маніторынг. Вынікі паказалі: пасля выкупу сацсеткі Маскам актыўнасць ботападобных уліковых запісаў узрасла. Аналіз маніторынгу з каментарыямі навукоўцаў быў апублікаваны на ABC News, а сам навуковы артыкул — у часопісе PLOS One.

І набыццё Твітэра, і стварэнне Грокіпедыі Маск тлумачыць не толькі камерцыйным патэнцыялам, але і ідэалагічнай складовай. Ён неаднаразова заяўляў, што аўтарытэтныя медыя і сацыяльныя платформы з добрай рэпутацыяй з'яўляюцца прадузятымі і кіруюцца леваліберальнай палітычнай прапагандай.

Затое штучны інтэлект Grok, Грокіпедыя і абноўлены X павінны былі б стаць пляцоўкамі для вольнага распаўсюджвання праўды ў разуменні Ілона Маска. Ён з'яўляецца прыхільнікам правых кансерватыўных поглядаў.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com