Лукашыстцы Петкевіч патрэбны Кашпіроўскі?

Чыноўніца мроіць пра «25-ы кадр».

Падаецца, што пытанні дэмаграфіі сур'ёзна занепакоілі чыноўнікаў. Але тое, якія прапановы па павышэнні нараджальнасці гучаць з высокіх кабінетаў, выклікае, мякка кажучы, здзіўленне.

Так, віцэ-прэм'ер па сацыяльных пытаннях Наталля Петкевіч заявіла пра «распрацаваныя дзяржпраграмы з рэвалюцыйнымі мерамі», якія нібыта «стымулююць нараджальнасць, мадэрнізуюць падтрымку жанчын і сем'яў з дзецьмі».

І тут жа выступіла з неардынарнай ініцыятывай:

«Акрамя матэрыяльных мер важная і атмасфера. У дзяцінстве мадэль паводзін фармуецца гульнёй: адна лялька — адно дзіця, дзве — двое. Дзіця, народжанае ў шматдзетнай сям'і, бачыць вясёлую, дружную карціну. Гэта 25-ы кадр, якому не надаюць увагі, але ён важны.

На білбордах, у рэкламе мы бачым маму і тату з адным-двума дзецьмі або больш. Трэба фарміраваць культуру: шматдзетная сям'я (2–3 і больш дзяцей) — гэта добра, правільна, заахвочваецца. Гэта дае будучыню сям'і і краіне. Гэта маральна-этычны аспект».

Так-так, вам не падалося — 25-ы кадр. Застаецца запрасіць Кашпіроўскага на пасаду кіраўніка Мінздароўя.

А далей віцэ-прэм'ер расказала пра важнасць стварэння ўмоў, каб беларускі не баяліся нараджаць. Прагучала даволі крамольна, судзіце самі. На думку Петкевіч, жанчына «не павінна выпадаць з працоўнай сістэмы — пасля дэкрэту бясшвоўна можа вярнуцца на месца працы»:

«Патрэбныя годныя ўмовы ў дэкрэце, плыўны пераход, магчымасць сумяшчаць працу і сям'ю. Жанчына павінна мець месца ў дзіцячым садку або дапамогу з дзіцем, каб выйсці на працу раней. Патрэбныя ўмовы для адукацыі дзяцей, якасная ахова здароўя».

Дык што атрымліваецца? За трыццаць з лішнім гадоў кіравання Лукашэнкі ў краіне так і не створаны ні ўмовы для адукацыі, ні якасная ахова здароўя? Ні годныя ўмовы ў дэкрэце для маладых мам? Калі так, то надзея на 25-ы кадр выглядае даволі рацыянальна.

Калі сур'ёзна, то ад сябе не можам не дадаць спіс фактараў страху для патэнцыйных маладых бацькоў, якія, на жаль, сталі новай рэальнасцю ў Беларусі.

Гэта і фактычны саўдзел у захопніцкай вайне, што пагражае нам прамым удзелам.

Гэта і мілітарызацыя грамадскай свядомасці, што цягнецца не першы год. У тым ліку закранае сістэму выхавання і адукацыі.

Фактычна тыя ж людзі, якія ратуюць за павышэнне нараджальнасці, прынамсі, не супраць таго, што з цяперашняга пакалення юных беларусаў гатуюць пушачнае мяса для чужых войнаў.

Не кажучы ўжо пра агульную атмасферу ў краіне, калі за неасцярожны лайк можна знікнуць на некалькі гадоў у пекле калоніі.

Кірыл Іваноў, «Салідарнасць»

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com