«Які можа быць «дах»? У нас жа не 90-я»

Настаўніца з Любанскага раёна абвінаваціла дырэктарку школы ў карупцыі і ціску.

У TikTok з'явіўся відэазварот настаўніцы Вольгі Сафаравай, якая працуе ў Кузьміцкай сярэдняй школе Любанскага раёна. Педагог расказала пра меркаваныя фінансавыя махінацыі з боку дырэктаркі навучальнай установы Людмілы Лучыновіч, а таксама пра бяздзеянне сілавікоў і ціск на настаўнікаў, якія спрабавалі дабіцца справядлівасці, паведамляе «Зеркало».

У сваім звароце з некалькіх ролікаў Вольга Сафарава сцвярджае, што ў школе на працягу многіх гадоў існавала схема крадзяжу бюджэтных грошай праз афармленне ў штат фіктыўных работнікаў. Паводле яе слоў, педагогі звярталіся ў розныя інстанцыі, але належнай рэакцыі не паследавала.

— На пачатку ліпеня 2025 года мы адправілі лісты ў Генеральную пракуратуру і АБЭП (аддзел па барацьбе з эканамічнымі злачынствамі; у Любані існуе група БЭП пры мясцовым РАУС. — Заўв. рэд.) з просьбай арганізаваць пракурорскую праверку па факце крадзяжу грашовых сродкаў шляхам афармлення «мёртвых душ» і незаконнага прысваення фінансаў дырэктаркай Кузьміцкай сярэдняй школы, — сцвярджае Вольга. — Лісты адразу ж спусцілі ў АБЭП Любанскага РАУС. Ніякай праверкі не паследавала. Супрацоўнікі адзін раз патэлефанавалі мне і яшчэ двум педагогам. Пасля гэтага даслалі адказ: у ўзбуджэнні крымінальнай справы — адмовіць.

Калектыў абскардзіў гэтае рашэнне на абласным узроўні. Яго ў выніку адмянілі і прызначылі новую праверку — але далучылі да яе тых жа супрацоўнікаў групы БЭП у Любані.

Пры гэтым, паводле словаў настаўніцы, праверка на раённым узроўні выявіла факты, пра якія калектыў школы нават не здагадваўся. У прыватнасці, высветлілася, што маці дырэктаркі значылася ў штаце ўстановы на працягу 14 гадоў.

— Існуюць «мёртвыя душы», пра якія мы нават не ведалі. Сам супрацоўнік АБЭП прачытаў [гэтыя звесткі] па базе работнікаў Кузьміцкай сярэдняй школы. <...>. Маці дырэктаркі школы з 2010 па 2024 год была работніцай школы, падменным вартаўніком месяц у годзе. 14 гадоў! І за 14 гадоў яе ні разу там ніхто не бачыў, — расказала настаўніца. — Аказваецца, так можна, як заявілі самі супрацоўнікі АБЭП.

Яна адзначыла, што, нягледзячы на выяўленыя факты, сілавікі не знайшлі падстаў для ўзбуджэння крымінальнай справы.

Настаўнікі не спыніліся і паспрабавалі прыцягнуць увагу да праблемы вышэйшага кіраўніцтва ў сферы адукацыі. Аднак, паводле слоў Вольгі, і там яны сутыкнуліся з глухой сцяной.

— Паралельна з праверкай органамі мы таксама звярталіся ў Міністэрства адукацыі, неаднаразова былі на прыёме ў начальніка галоўнага ўпраўлення па адукацыі Мінаблвыканкама Мікалая Башко. Ёсць калектыўная скарга, з якой мы звярталіся. У ёй подпісы педагогаў, бацькоў. <...>. У лістападзе 2025 года Башко прыязджаў у Кузьмічы ў школу на разбор, — сцвярджае Вольга.

Але замест аб'ектыўнага расследавання, як кажа Сафарава, педагогі атрымалі ў адказ ціск і пагрозы звальненнем:

— У мой бок прагучалі публічныя пагрозы: калі я не зразумею, што я не маю рацыі, мяне не будзе ў адукацыі, а калі зразумею — буду. Мы яшчэ думаем, куды з імі звярнуцца, ёсць запіс.

Вольга таксама расказала пра парушэнні ў арганізацыі навучальнага працэсу. Паводле яе слоў, дырэктарка, будучы настаўніцай матэматыкі, фіктыўна вяла ўрокі.

— У мінулыя гады яна брала сабе гадзіны матэматыкі ў некаторых класах. Урокі і кантрольныя не праводзіла, прыходзіла раз у чвэрць, — сцвярджае Сафарава. — Пра гэта казалі дзеці, бацькі, ведалі педагогі. І мы пісалі пра гэта ў Міністэрства адукацыі ў калектыўнай скарзе, у некалькіх скаргах у пракуратуру. Але па гэтым пытанні ніхто не разбіраўся. У адказах па гэтым пытанні няма ніводнага слова.

Педагог адзначыла, што ўсе скаргі, накіраваныя ў вышэйшыя інстанцыі, нязменна вярталіся для разгляду на мясцовы ўзровень, дзе, на яе думку, хаваюць парушэнні.

TikTok — Зрабі свой дзень

— Адбываецца ўкрывальніцтва з боку Любанскага аддзела адукацыі, іншых органаў райвыканкама, — лічыць Сафарава. — Але ў нас ёсць сведкі — іх дзясяткі. Чарговая наша калектыўная скарга з подпісамі была накіраваная ў пракуратуру Мінаблвыканкама. Яе зноў спусцілі ў пракуратуру Любанскага раёна. Хаця мы вельмі прасілі разабрацца без удзелу раёна.

Сітуацыя ў школе, паводле яе слоў, нагадвае «ліхія 90-я», дзе дырэктарка адчувае сваю поўную беспакаранасць.

— Дырэктарка неаднаразова хвалілася сваім «дахам». Якім «дахам», хлопцы? У нас не 90-я, — эмацыйна падкрэслівала ў відэа настаўніца.

Нягледзячы на ціск і адсутнасць рэакцыі з боку ўладаў, Вольга Сафарава мае намер дамагацца справядлівасці і верыць, што праўда ўрэшце пераможа.

— І зноў мы чакаем чарговую адпіску. Мы не чакаем цуду. Лучыновіч, вы проста не пакінулі нам выбару. Шчыра, мне як педагогу брыдка ў гэтым удзельнічаць. <...>. «Дах», якім вы так моцна хваліцеся, ён жа дзесьці заканчваецца. <...>. Мы абавязкова дойдзем да справядлівасці, колькі б гэта ні цягнулася, таму што гэта ўжо пытанне гонару, — заключае Вольга Сафарава.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com