WP: Пуціну давядзецца сутыкнуцца з гневам сваіх прыхільнікаў

Кіраўніку Крамля нагадалі аб паўстанні Прыгожына

За тры гады з пачатку поўнамаштабнага ўварвання РФ ва Украіну многія расейцы глыбока прасякнуліся ідэалагічным наратывам расейскага дыктатара Уладзіміра Пуціна і нацыяналістаў, паводле якога Масква вядзе экзістэнцыйную вайну з "калектыўным Захадам" на чале з ЗША. Апошнім часам стасункі Расеі з Вашынгтонам пры адміністрацыі прэзідэнта Дональда Трампа мякчэюць, што выклікае незадаволенасць нават сярод заўзятых прыхільнікаў лідара Крамля, піша The Washington Post.

Журналісты выдання правялі апытанне сярод «супольнасці Z», у якія ўваходзяць расейскія вайсковыя карэспандэнты, ультранацыяналісты і прыхільнікі вайны супраць Кіева, якія хочуць поўнага панавання над Украінай. Многія з іх заявілі, што не хочуць, каб Расея пагадзілася на мірнае ўрэгуляванне канфлікту, калі гэта не прывядзе да адхілення прэзідэнта Украіны Уладзіміра Зяленскага і змены ўлады ў Кіеве.

Адзначаецца, што Пуціну даводзіцца сачыць за гэтай актыўнай часткай расейскага грамадства, якая ўзмацнілася падчас вайны супраць Украіны. Журналісты нагадалі, што ў 2023 годзе гэта перарасло ў адкрытае паўстанне пасля нядоўгага бунту экс-кіраўніка наймітаў з ПВК "Вагнер" Яўгена Прыгожына.

У выданні падкрэслілі, што Крэмль часта выкарыстоўваў “турбапатрыётаў” для прасоўвання прапаганды неабходнасці кровапралітнай вайны супраць Украіны. Частка гэтых людзей ваюе супраць украінцаў на фронце.

Адваротным бокам “турбапатрыётаў” з'яўляецца тое, што яны таксама сталі рэдкай крыніцай крытыкі як Пуціна, так і прынятых ягоным урадам пастаноў. Магчыма, яны не пагодзяцца на 30-дзённае замірэнне з Украінай, калі кіраўнік РФ пойдзе на гэта.

Высокапастаўлены крамлёўскі чыноўнік расказаў журналістам, што абавязкова знойдуцца расейцы, якія будуць незадаволеныя нармалізацыяй двухбаковага дыялогу Расеі з ЗША.

“Ёсць значная частка грамадства, якая кажа, што баіцца і не будзе задаволеная гарантыямі бяспекі, калі Украіна проста будзе далей існаваць”, - сказаў ён.

У "супольнасці Z" усё больш незадаволеныя тым, што РФ наладжвае стасункі з ЗША. Вайсковыя блогеры і нацыяналісты называюць прапанаванае спыненне агню "спробай выкрасці перамогу ў Раскі".

У выданні нагадалі, што пісьменнік-нацыяналіст Захар Прылепін не падтрымаў агульнае захапленне расейцаў праз сварку Зяленскага і Трампа падчас іх сустрэчы ў Авальным кабінеце.

«Важна, наколькі баяздольныя ўзброеныя сілы Украіны, як ідуць справы з Рускай праваслаўнай царквой ва Украіне і чые салдаты разгульваюць па Кіеве, Адэсе, Харкаве, Краматорску і Херсоне, якія, паводле нашай канстытуцыі, з'яўляюцца часткай Расеі», - пісаў ён.

Таксама незадаволенасць расце і сярод расейскіх вайскоўцаў. Былы баец ПВК “Вагнер” заявіў у размове з журналістамі, што далёка не ўсе салдаты разумеюць, з кім напраўду ім даводзіцца ваяваць. Паводле яго слоў, "Амерыка не хоча моцнай Расеі".

“Гайдук”, камандзір расейскага выведвальнага падраздзялення, які ваюе ў Часавым Яры, сказаў у размове з журналістамі, што ён хоча, каб Расея перамагла Украіну і “знішчыла Зяленскага”. Ён падкрэсліў, што расейцам давядзецца прыняць пастанову Пуціна, калі ён пагодзіцца на замірэнне з Украінай, але гэта будзе зроблена "з разбітымі сэрцамі".

Са слоў “Гайдука”, станоўчым аспектам вайны з'яўляецца тое, што “расейскае грамадства вяртаецца да таго, якім яно павінна быць”.

"Раней Уладзімір Пуцін быў занадта еўрапейскім, занадта заходнім. Цяпер Пуцін вяртаецца дадому, ва ўлонне расейскай цывілізацыі", - растлумачыў ён.

Былы памочнік Пуціна ў размове з журналістамі падзяліўся, што жорсткія нацыяналісты ў войску і службах бяспекі "бачаць ворагаў паўсюль", але ў іх мала ўплыву ў Крамлі. Ён мяркуе, што гэтыя людзі не будуць перашкаджаць дзеянням Пуціна ў аднаўленні дыпламатычных сувязяў з ЗША ці перамовам аб укладанні мірнага пагаднення.

“Ніхто ў Крамлі не прыслухоўваецца да меркавання гэтых пластоў грамадства. Яны выкарыстоўваюць іх, калі гэта трэба для прапаганды, але насамрэч у іх вельмі мала рэальнага ўплыву”, - запэўніў былы памочнік Пуціна.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com