«У Беларусі людзі прыходзяць павесяліцца нібыта астатні раз»
- 24.03.2025, 16:51
- 5,284
Як беларусы адкрылі ў Польшчы начны клуб.
Аляксандр (імя зменена) разам з партнёрам адкрыў у Беластоку начны клуб Balance. Ён арыентаваны на моладзь, тут круцяць электронную музыку. Інвестыцыі ў праект склалі больш за 100 тысяч даляраў: беларусы думалі ўкласці менш, але спачатку не ўлічылі асаблівасці польскага клубнага бізнэсу. Як ён створаны і чаму добры гук - пытанне выжывання, Аляксандр распавёў MOST.
Надумалі рызыкнуць
У Беларусі ў Аляксандра таксама быў клубны бізнэс, ён арганізоўваў маштабныя вечарыны. У 2020 годзе мужчына пераехаў у Беласток, паступіў у мясцовую ВНУ і надумаў: калі заставацца ў горадзе, то з улюбёнай справай.
- Проста адкрыць клуб недастаткова: трэба разумець, для каго ты гэта робіш, - кажа Аляксандр. - Я вучыўся ў Беластоку і разумею, чаго хоча мясцовая моладзь.
У пачатку 2024 года Аляксандр і яго партнёр знайшлі прыдатнае памяшканне ў цэнтры горада - 275 квадратных метраў на вуліцы Мальмеда. Да іх у гэтым месцы ўжо спрабавалі працаваць тры начныя клубы, але ніводны доўга не пратрымаўся. Беларусы наважылі рызыкнуць.
- Хоць да нас тут ужо былі ўстановы, нам прыйшлося рабіць усё з нуля: перафарбоўвалі сцены і падлогу, будавалі шумаізаляцыю, гардэроб. Гэта быў наш першы бізнэс у Польшчы, і мы надумалі ўкласціся добра. Вядома, спачатку здавалася, што ўсё абыдзецца танней, але ўсплылі нюансы.
«У Беларусі людзі прыходзяць пагуляць як апошні раз. У Польшчы - гэта больш пра адпачынак»
Самым затратным было абсталяванне. Са слоў Аляксандра, асабліва важна было інвеставаць у гук: для электроннай сцэны гэта крытычна важна.
- Калі ў цябе дрэнны гук, да цябе перастануць хадзіць. У Польшчы клуб абавязаны сам даваць абсталяванне дыджэям. У Беларусі ўсё наадварот: дыджэі прыязджаюць са сваёй тэхнікай. Мы не закладвалі гэта ў бюджэт, але прыйшлося закупляць дарагую апаратуру: пульты, экраны, лазеры, - распавядае ён.
Так укладанні ў праект перавысілі 100 тысяч даляраў.
Аляксандр кажа, што адчыняць клуб у Польшчы агулам складаней, чым у Беларусі. Тут і канкурэнцыя вышэйшая, і патрабаванні больш строгія.
- У Беларусі мы б уклалі ўдвая менш. А тут у адным толькі Беластоку 13 начных клубаў. Хочаш, каб да цябе хадзілі, - трымай узровень. Але ёсць і плюсы: тут можна запрасіць кожнага еўрапейскага дыджэя. Нядаўна ў нас гуляў дыджэй з Шатландыі. У Беларусі зараз з гэтым складана: мала хто з Еўропы гатовы туды ехаць.
Аляксандр адзначае і культурныя адрозненні паміж публікай у Беларусі і Польшчы.
- У Беларусі людзі прыходзяць у клуб пагуляць як астатні раз. У Польшчы - гэта больш пра адпачынак. І наведвальнікі ветлівыя. Калі хтосьці выпадкова разаб'е шклянку ў бары, прапануе сам прыбраць і яшчэ пакіне гасцінец.
Клуб беларуса працуе тры дні на тыдзень: чацвяргамі, пятніцамі і суботамі. Каманда імкнецца рабіць тэматычныя вечарыны, ёсць дні, калі для моладзі ўваход вольны.
- Наша аўдыторыя - у асноўным палякі, але ходзяць і замежнікі: гішпанцы, партугальцы, украінцы, беларусы. Мы не дзелім людзей паводле нацыянальнасці. Часта бываю ў клубе сам і бачу, як паміж сабой камунікуюць зусім розныя людзі. Мы хочам паказаць, што ў Беластоку можа быць папулярнай электронная музыка: тэхна, хард-тэхна, драм-н-бейс. Не толькі папса і дыска-пола.
«Першы год - праверка»
Аляксандр не хавае: першы год быў няпростым.
- Мы ведалі, што першы год - гэта праверка. Ці зможам утрымацца, ці зможам справіцца з цяжкасцямі. Так, былі памылкі, былі ўзлёты і падзенні, але мы сталі расці. Бачым святло ў канцы тунэля і пачынаем атрымліваць першы плён.
На вечарыны ў клуб прыходзяць у сярэднім ад 100 чалавек. На топавыя мерапрыемствы - да 500. Але нават з такой наведвальнасцю да поўнай акупляльнасці яшчэ далёка.
- Такі бізнэс, як клуб, акупляецца за тры гады - гэта класіка для вялікага горада. У Варшаве, можа, і за год адбіліся б. Ці, наадварот, прагарэлі б хутчэй. У Беластоку – іншая дынаміка. Мы знайшлі сваю нішу і робім стаўку на вечарынкі. Каб вярнуць укладзеныя грошы, нам трэба яшчэ крыху часу.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас charter97@gmail.com
