Папа Рымскі прызнаў Антоніё Гаўдзі шаноўным Слугой Божым

Выбітны гішпанскі дойлід уважаў сваю працу за важную місію набліжаць людзей да Бога.

14 красавіка Папа Францішак упаўнаважыў Дэпартамент у праслаўленні святых, у асобе яго прэфекта кардынала Марчэла Семерара, прызнаць гераічныя цноты свецкага чалавека Антоніё Гаўдзі, які прысвяціў жыццё будаўніцтву базілікі Саграда Фамілія. Выбітны гішпанскі дойлід уважаў сваю працу за важную місіяю: «набліжаць людзей да Бога», паведамляе «Радыё Ватыкана».

Тытул шаноўных Слуг Божых таксама прысвоены святарам П’етра Джузэпэ Трыесту, Анджэла Бугеці і Агусціна Кацаліна. Акрамя таго, Біскуп Рыма адобрыў беатыфікацыю індыйскай манашкі Элізвы Прасвятой Дзевы, заснавальніцы Трэцяга ордэна босых кармелітак, і місіянера-навамучаніка Надзарэна Ланчоці.

Галоўным подзвігам жыцця Антоніё Гаўдзі, прадстаўніка каталонскага мадэрнізму і «архітэктара ад Бога», стала ўзвядзенне Саграда Фамілія ў Барсэлоне.

Антоні Гаўдзі-І-Карнэт нарадзіўся 25 чэрвеня 1852 года і ў трыццацігадовым узросце ўзначаліў будаўніцтва сабора, спалучаючы талент мастака з глыбокай верай. Малады дойлід ўважаў будаўніцтва храма за справу, даручаную яму Самім Богам. Гаўдзі змяніў першапачатковы праект, напоўніўшы яго прыроднымі формамі, багатай сімволікай і духоўным сэнсам у традыцыях францысканцаў і бенедыктынаў. У 1894 году, пасля цяжкай хваробы, выкліканай строгім пастом, страціўшы ўсіх сямейнікаў, ён з яшчэ вялікай стараннасцю звярнуўся да Бога і неўзабаве адмовіўся ад новых замоў, цалкам прысвяціўшы сябе толькі базіліцы. У 1925 годзе ён пераехаў у невялікае памяшканне побач з касцёлам. Паводле ягоных слоў, ён ператварыў мастацтва ў гімн хвалы Богу.

7 чэрвеня 1926 года Гаўдзі быў збіты трамваем. Неапазнаны, ён быў дастаўлены ў гарадскую лякарню для бедных, дзе, прыняўшы Святыя Таінствы, ён адышоў да Госпада 10 чэрвеня. Развітацца з ім прыйшлі блізу 30 тысяч чалавек.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com