Архіў ФРГ: Пуцін яшчэ ў 1994 годзе прэтэндаваў на Крым і Казахстан

Пра гэта сведчыць апублікаваны запіс генконсула Нямеччыны ў Санкт-Пецярбургу.

Уладзімір Пуцін яшчэ ў 1994 годзе выказваў тэрытарыяльныя прэтэнзіі Расеі на Крым, Усходнюю Украіну і Паўночны Казахстан. Пра гэта піша ў чацвер, 31 ліпеня, нямецкі часопіс Der Spiegel са спасылкай на архіўныя дакументы МЗС Нямеччыны.

Пуціна цытаваў генконсул ФРГ

21 ліпеня 2025 года ў продаж выйшаў чарговы том зборніка «Дакументы аб знешняй палітыцы ФРГ». Яго выпускае Інстытут найноўшай гісторыі ў Мюнхене (Institut für Zeitgeschichte). Новы том прысвечаны першаму паўгоддзю 1994 года, перадае DW.

Журналісты Der Spiegel, якія азнаёміліся з кнігай, пішуць, што ў адным з дакументаў прыводзіцца цыдулка генеральнага консула ФРГ у Санкт-Пецярбургу. 14 студзеня 1994 года ён запісаў, што Пуцін «выразна» паўтарыў яму тое, што казаў і раней.

Пуцін аб прэтэнзіях да Украіны і Казахстана

«З ягоных слоў, Крым, Усходняя Украіна і Паўночны Казахстан — як мінімум гэтыя раёны — ніколі не былі для Расеі замежнымі, а заўсёды былі часткай расейскай тэрыторыі. Ніводнаму рускаму нібыта немагчыма растлумачыць, чаму гэта цяпер іншая краіна», — такія словы Пуціна прывёў нямецкі дыпламат.

Паводле яго запісу, Пуцін тады звярнуў увагу на нейкае нацыянальнае пачуццё рускіх, якое немцам, «напэўна, цяжка зразумець».

Пуцін працягнуў, што «праблем няма», калі эканамічнае і сацыяльнае становішча расейцаў ва Украіне і Казахстане здавальняючае. Але, паводле ацэнкі Пуціна, гэта было не так, што, паводле яго слоў, гуляла на руку расейскім палітыкам-нацыяналістам, такім як Уладзімір Жырыноўскі.

Краіны Захаду «дрэнна інфармаваныя, калі называюць адраджэннем расейскага імперыялізму тое, што з'яўляецца толькі апраўданым успрыманнем расейскіх інтарэсаў», — цытаваў далей Пуціна нямецкі дыпламат.

У 1994 годзе Пуцін працаваў на Анатоля Сабчака

Паводле адкрытых звестак, генеральным консулам ФРГ у Санкт-Пецярбургу ў 1991–1995 гадах быў Эберхард фон Путткамер. Ён памёр у 2019 годзе.

Пуцін у 1994 годзе працаваў на кіруючых пасадах ва ўрадзе Санкт-Пецярбурга, якім тады кіраваў Анатоль Сабчак. Той актыўна развіваў адносіны з Захадам, але абвінавачваў улады Украіны ў нацыяналізме і таксама казаў, што Крым павінен належаць Расіі. Сабчак сцвярджаў, што пасля распаду СССР ягоныя рэспублікі павінны вярнуцца да становішча снежня 1922 года, калі быў заснаваны Савецкі Саюз.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com