«У нас тэлефоны разрываюцца»

Журналісты паспрабавалі даведацца, чаму перавозчыкі масава скасавалі аўтобусы паміж Менскам і Вільняй.

У аўторак, 12 жніўня, адразу два буйныя перавозчыкі — беларускі «Мінсктранс» і літоўскі Eurolines — абвясцілі аб прыпыненні большасці аўтобусных рэйсаў паміж Менскам і Вільняй. Для пасажыраў гэта стала непрыемным сюрпрызам.

«Зеркало» паспрабавала высветліць, што насамрэч стаіць за транспартным калапсам на адным з самых запатрабаваных кірункаў.

«У пошце ўжо 456 лістоў»

Першым аб скасаванні рэйсаў паведаміў перавозчык Eurolines, а неўзабаве да яго далучыўся і «Мінсктранс». У сваім паведамленні беларуская дзяржаўная кампанія ўдакладніла, што прыпыненне будзе дзейнічаць «да атрымання неабходных дазвольных дакументаў».

Журналісты паспрабавалі атрымаць аператыўны каментар у «Мінсктранса», аднак зрабіць гэта не ўдалося. Пры званку на гарачую лінію аўтаадказчык паведаміў, што колькасць тых, хто чакае ў чарзе, «перавысіла 20 чалавек». Праз пяць хвілін чакання на лініі званок проста абарваўся.

Датэлефанавацца да віленскай філіі Eurolines журналістка не змагла цягам гадзіны. У выніку адправілася на аўтавакзал, дзе і знаходзіцца віленскі офіс кампаніі.

- У нас тэлефоны разрываюцца. Мы часам іх уключаем і адказваем, пакуль стае нерваў. Потым - адключаем, - прызналася адна з супрацоўніц перавозчыка. - У пошце ўжо 456 лістоў. Калі мы на іх зможам адказаць, аднаму гаспадару вядома.

У офісе Eurolines адзначаюць, што ў перавозчыка засталося тры рэйсы на дзень замест 13 (рэйсам тут называюць дзве паездкі: з Вільні ў Менск і назад), якія былі раней. Чаму ён стаў касаваць іх, супрацоўніца не ведае. Кажа, што аўтобусы кампаніі «не выпускае Літва». Аб прычынах яна не ў курсе.

- Кіраўніцтва сказала, што да 18 жніўня яно будзе разбірацца. Быццам бы нешта ў гэты дзень там намячаецца. Я вось таксама чакаю адказу. Мне самой вельмі страшна, бо гэта мая праца, сфера дзейнасці, - сказала супрацоўніца. Па афіцыйныя каментарыі яна прапанавала звярнуцца ў офіс кампаніі Toks, якая пад брэндам «Еўралайнс» возіць пасажыраў з Вільні ў Менск і назад.

Што ў іншых перавозчыкаў?

Каб зразумець, ці стала праблема сістэмнай і ці закранае яна ўсіх гульцоў на рынку, журналісты звярнуліся да іншага буйнога перавозчыка - Ecolines. У літоўскім офісе кампаніі запэўнілі, што іх праца ідзе ў штатным рэжыме:

- Праблемы з рэйсамі ўзніклі толькі ў «Мінсктранса» і Eurolines. У нашай кампаніі ўсё добра, рэйсы не скасаваныя, кожны з іх адпраўляецца паводле раскладу.

Як падлічылі журналісты, да скасавання на гэтыя тры перавозчыкі прыпадала 28 рэйсаў штодзень (гаворка пра паездкі туды і назад). Пачынаючы з 14 жніўня з Менска ў Вільню і назад будзе ўгулам 15 рэйсаў на дзень: па шэсць ад Ecolines і «Мінсктранса» і тры ад Eurolines (Toks).

Нагадаем, у пачатку 2024 года ўрад Літвы пастанавіў скараціць колькасць дазволаў на аўтобусныя перавозкі паміж Літвой і Беларуссю ўдвая - з 58 да 29. Дазволы выдаюцца паводле прынцыпу парытэту: каб яго атрымаў літоўскі перавозчык, аналагічны дакумент павінен быць і ў яго беларускага партнёра.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com