Вугоршчына засталася без расейскай нафты праз удары па трубаправодзе «Дружба»

УСУ ўвялі свае «санкцыі».

Вугоршчына перастала атрымліваць расейскую нафту праз удар Узброеных сіл Украіны (УСУ) па ключавой размеркавальнай станцыі трубаправода «Дружба» ў Бранскай вобласці 12—13 жніўня, паведаміў міністр замежных спраў і замежнаэканамічных сувязей Петэр Сіярта. Ён расказаў, што намеснік міністра энэргетыкі РФ Павел Сарокін праінфармаваў яго аб рамонтных работах на аб'екце. З улікам таго, што яны «вядуцца бесперапынна, ёсць вялікая імавернасць», што пастаўкі нафты адновяцца ў пятніцу, дадаў Сіярта.

УСУ пачалі біць па лінейнай вытворча-дыспетчарскай станцыі (ЛВДС) «Унеча» ў сяле Высокім Бранскай вобласці з вечара 12 жніўня. Губернатар Аляксандр Багамаз паведамляў, што для нападу выкарыстоўваліся рэактыўныя набоі і беспілотнікі. Спадарожнікавыя здымкі зафіксавалі значны пажар. Станцыя «Унеча» - найбуйнейшы вузел магістральнай сеткі нафтаправодаў «Дружба» агульнай працягласцю 8900 км. Галоўная спецыялізацыя ЛВДС - транспартаванне нафты па трубаправодах. Аб'ект належыць холдынгу «Транснафтапрадукт». Да гэтага беспілотнікі атакавалі станцыю 6 жніўня, пасля чаго там таксама адбыўся пажар.

Вугоршчына застаецца адной з дзвюх краін Еўразвязу, якія працягваюць набываць расейскую нафту. У ліпені яна імпартавала «чорнага золата» з РФ на 200 млн еўраў, ацэньваюць аналітыкі СREA. Таксама Вугоршчына закупляе газ «Газпрама» (на 285 млн еўра ў ліпені), што робіць яе найбуйнейшым імпарцёрам расейскіх вуглевадародаў у Еўропе. Нафту па «Дружбе» у Еўразвязе закупляе яшчэ і Славаччына (на 169 млн еўра ў ліпені). Акрамя таго, Бельгія, Францыя і Гішпанія імпартуюць расейскі ЗПГ, вынікае са звестак CREA.

Трубаправод «Дружба» быў пабудаваны ў 1960-я гады. Ён бярэ пачатак у Альмецьеўску (Расея) і праходзіць праз Мазыр (Беларусь), дзе падзяляецца на дзве галінкі. Паўднёвая галінка ідзе праз Украіну ў Чэхію, Славаччыну, Вугоршчыну і Харватыю. Паўночная - у Польшчу і Нямеччыну. Пастаўкі расейскай нафты па паўночнай галінцы былі спыненыя праз санкцыі, аднак гэтым маршруце працягвае транспартавацца нафта з Казахстана. Да вайны ва Украіне праз нафтаправод «Дружба» Расея пастаўляла ў Еўразвяз амаль 720 тысяч барэляў сырой нафты штодня.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com