Лідары ЕЗ абнародавалі супольную заяву пасля сустрэчы Трампа і Пуціна

Не павінна быць ніякіх абмежаванняў для УСУ, а таксама ніякага вета на ўступленне Украіны ў ЕЗ і NATO.

Еўрапейскія лідары абнародавалі супольную заяву пасля сустрэчы Дональда Трампа і Уладзіміра Пуціна на Алясцы. Заява прэзідэнта Францыі Эмануэля Макрона, прэм'ер-міністра Італіі Джорджы Мелоні, канцлера Нямеччыны Фрыдрыха Мэрца, прэм'ер-міністра Брытаніі Кіра Стармера, прэзідэнта Фінляндыі Аляксандра Стуба, прэм'ер-міністра Польшчы Дональда Туска, прэзідэнта Еўрарады Антоніу Кошты і прэзідэнткі Еўракамісіі Урсулы фон дэр Ляен апублікаваная на сайце ЕК.

Адзначаецца, што лідары вітаюць намаганні прэзідэнта Трампа па спыненні забойстваў ва Украіне, спыненні агрэсіўнай вайны Расеі і дасягненні справядлівага і трывалага міру.

«На задуму прэзідэнта Трампа, наступным крокам павінны стаць далейшыя перамовы з удзелам прэзідэнта Зяленскага, з якім ён неўзабаве сустрэнецца», - гаворыцца ў заяве.

Еўрапейскія лідары таксама падкрэслілі, што гатовыя працаваць з прэзідэнтам Трампам і прэзідэнтам Зяленскім над правядзеннем трохбаковага саміту пры падтрымцы Еўропы. У той жа час падкрэсліваецца, што Украіна павінна мець дакладныя гарантыі бяспекі для эфектыўнай абароны свайго суверэнітэту і тэрытарыяльнай цэласнасці.

«Мы вітаем заяву прэзідэнта Трампа аб гатоўнасці ЗША даць гарантыі бяспекі. Кааліцыя добраахвотнікаў гатова адыгрываць актыўную ролю. Узброеныя сілы Украіны і яе супрацоўніцтва з трэцімі краінамі не павінны зазнаваць ніякіх абмежаванняў. Расея не можа накласці вета на шлях Украіны ў ЕЗ і NATO».

Таксама еўрапейскія лідары адзначаюць, што пастановы наконт сваёй тэрыторыі будуць прымацца Украінай, і міжнародныя межы не павінны змяняцца сілай.

«Мы будзем працягваць падтрымліваць Украіну. Мы поўныя рашучасці зрабіць больш для ўмацавання Украіны, каб пакласці канец баявым дзеянням і дасягнуць справядлівага і трывалага міру», - гаворыцца ў заяве.

Таксама хаўруснікі Украіны заяўляюць, што гатовы і далей аказваць націск на Расею.

«Мы працягнем узмацняць санкцыі і ўжываць больш шырокія эканамічныя захады для ціску на вайсковую эканоміку Расеі датуль, пакуль не будзе дасягнуты справядлівы і трывалы мір».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com