«Скульптура набыла містычную гісторыю»

Беларусам распавялі пра знаёмства з чалавекам, які стаў прататыпам скульптуры «Прыкурваючы» ў цэнтры Мінска.

Карыстальнік сацсеткі Threads падзяліўся гісторыяй знаёмства з чалавекам, які быў прататыпам скульптуры «Прыкурваючы», якая знаходзіцца ў Міхайлаўскім скверы ў Мінску, піша «Зеркало».

Рэч ідзе пра акцёра і першага спонсара кінастудыі «Беларусьфільм» Уладзіміра Галынскага.

— Бронзавая скульптура мужчыны ў кепцы, які просіць прыкурыць, была замоўлена акцёрам дзеля таго, каб прыцягнуць увагу да толькі што выпушчанага ім фільма «Справа Лахоўскага». На жаль, Галынскі загінуў да моманту, калі скульптуру пачалі адліваць, а сама скульптура набыла містычную гісторыю, — гаворыцца ў апісанні гэтай скульптуры на сайце, прысвечаным экскурсіям і адпачынку ў Беларусі.

А вось карыстальнік Threads з Расіі Уладзімір Максімаў падзяліўся сваёй версіяй таго, як з'явіўся помнік, а таксама распавёў пра знаёмства з Галынскім. Паводле яго слоў, яно адбылося ў другой палове 90-х гадоў.

— Прыязджаю да брата ў Мінск, сядзім у яго ў офісе, заходзіць мужычок. Брат знаёміць: гэта мой добры прыяцель Воўчык. Ну, пасядзелі, крыху пагутарылі, потым Воўчык прапанаваў паехаць да яго, па-людску папіць, — распавядае ён.

Галынскі зрабіў на яго ўражанне кампанейскага чалавека, таму яны з братам хутка пагадзіліся паехаць у госці.

— Прыязджаем. Звычайная хрушчоўка, «савковая» абстаноўка. Звычайнае мужчынскае застолле з размовамі ад цэн на Камароўцы да калгасніка-прэзідэнта… Я амаль не піў, пайшоў задрамаць на канапу. Брат з Воўчыкам паддалі, пайшлі на балкон правяраць, чый пісталет праб'е вядро з вадой, калі страляць зверху ў ваду, — распавядае аўтар паста.

Ён кажа, што «час быў бандыцкі: у кожнага бізнесмена была зброя».

— Ну патроху ўсе супакоіліся. Раніцай раз'ехаліся, і я забыўся пра гэта. Праз некалькі гадоў прыязджаю зноў. Брат адразу з самалёта везе ў нейкі сквер, падводзіць да нейкага помніка і пытаецца, ці пазнаю я яго, — успамінае ён і дадае, што адразу не пазнаў.

З яго слоў, тады брат паведаміў яму, што гэта ж Воўчык Галынскі. На пытанне, як ён тут апынуўся, брат адказаў, што «Воўчык Галынскі быў бізнесменам сярэдняй рукі. У свой час за нешта адседзеў. Займаўся вытворчасцю пліткі для столі з пенапласту і ўвесь прыбытак раздаваў, падтрымліваючы акцёраў, мастакоў, а сам ездзіў на задрыпанай «Акай»».

— Ну, чалавек з мінулым і няпростым лёсам. У нейкі момант памірае ад перадазавання. Дык тыя, каму ён дапамагаў і каго падтрымліваў, скінуліся і паставілі яму помнік, — выклаў свае разважанні аўтар паста.

Ён прызнаецца, што толькі пасля гэтага даведаўся, што Галынскі быў яшчэ і акцёрам і зняў фільм.

— Зразумела, што асабліва не афішавалася, каму помнік, але вензель «ВГ» на каналізацыйным люку назаўсёды ўпісаны ў гісторыю.

Нагадаем, скульптура «Прыкурваючы» з'явілася ў Міхайлаўскім скверы ў 1999 годзе. Скульптар — Уладзімір Жбанкоў. У тым жа скверы ёсць яшчэ дзве яго працы — «Дзяўчынка з парасонам» і першая, што з'явілася, — «Незнаёмка», якую часта называюць проста дамай на лаўцы.

Пра тое, што праобразам «Прыкурваючага» стаў Уладзімір Галынскі, распавядаў сам Жбанкоў:

«Даведаўшыся, што я — аўтар «Незнаёмкі», ён з'явіўся ў мяне ў майстэрні з незвычайнай прапановай: зрабіць падарунак гораду — адліць у метале нейкага прыкольнага персанажа. Напрыклад, мужычка, які стаіць на люднай вуліцы, курыць і замінае мінакам. Я прапанаваў зрабіць яго „страляючым“ цыгарэтку. Уважліва прыгледзеўшыся да заказчыка, зразумеў, што менавіта з яго і трэба ляпіць».

Працу майстар выканаў вельмі хутка, літаральна за тры месяцы. Скульптура яшчэ не была ўсталяваная, калі Галынскі загінуў.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com