«Герой СВА» паклікаў на спатканне і забіў 17-гадовую дзяўчыну ў анексаваным Крыме

Расійскі акупаант пазнаёміўся з дзяўчынай у інтэрнэце.

Удзельніка ўварвання ва Украіну затрымалі па падазрэнні ў забойстве 17-гадовай студэнткі Джанкойскага прафесійнага тэхнікума Эльвіны Краўчанка у анексаваным Крыме. Пра гэта паведамляе Astra. Паводле даных канала, падазраваны — 21-гадовы Дзмітрый Папоў, кантрактнік Узброеных Сіл РФ, — пазнаёміўся з дзяўчынай у інтэрнэце і 4 студзеня паклікаў яе на спатканне, пасля чаго яна знікла.

Эльвіна, якая пражывала ў вёсцы Мар'іна Джанкойскага раёна, паведаміла родным, што едзе да бацькі, але замест гэтага адправілася на сустрэчу з новым знаёмым. Некалькі дзён дзяўчыну не маглі знайсці, пасля чаго яе цела выявілі ў полі. Паводле даных Astra, забойца спрабаваў спаліць труп. Інфармацыю пра затрыманне вайскоўца пацвердзілі мясцовыя жыхары і сваякі загінулай. Падазраваны знаходзіцца ў СІЗА Сімферопаля. Прапагандысцкае выданне «Расійская газета» таксама пісала пра затрыманне «Дзмітрыя П.», не згадваючы яго сувязь з арміяй.

З вывучаных Astra даных вынікае, што затрыманы вучыўся ў Тальяцінскім машынабудаўнічым каледжы і з'яўляецца ўдзельнікам уварвання ва Украіну. Відэа з вайны ён выкладаў у сваіх сацсетках з красавіка 2025 года.

Гэты інцыдэнт адбыўся на фоне агульнага росту злачынстваў, учыненых тымі, хто вярнуўся з фронту. Паводле «Вёрсткі», за няпоўныя чатыры гады вайны «ветэраны СВА» забілі і пакалечылі больш за 1000 чалавек. Ад іх рук загінула не менш як 551 чалавек, больш за палову з іх — ад дзеянняў былых зняволеных.

Статыстыка МУС за першыя 10 месяцаў 2025 года паказвае, што колькасць цяжкіх злачынстваў, учыненых арганізаванымі злачыннымі групамі (АЗГ) у Расіі, вырасла на 33,6% у параўнанні з аналагічным перыядам 2024 года і склала 44 тысячы. Агульная колькасць групавых злачынстваў павялічылася на 18%. Судовая статыстыка таксама фіксуе рост: колькасць асуджаных за арганізацыю злачыннай супольнасці (ч. 1 арт. 210 КК РФ) за тры гады вайны вырасла амаль у чатыры разы.

У цэлым, паводле афіцыйнай статыстыкі, колькасць цяжкіх і асабліва цяжкіх злачынстваў у Расіі мінулага года дасягнула максімуму за 15 гадоў. За першае паўгоддзе 2025-га было зафіксавана 333 251 такое злачынства — найвышэйшы паказчык з 2010 года. Па выніках 2024 года быў усталяваны рэкорд за 14 гадоў — 617 301 злачынства па цяжкіх і асабліва цяжкіх артыкулах КК РФ.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com