Шмат страляніны, шпіёны і крэпасць у Каракасе: як камандос ЗША дзёрзка выкралі Мадуру

Дыктатар хаваўся ў бункеры за сталёвымі дзвярыма.

Кіраўнік Венесуэлы Нікалас Мадура і ягоная жонка Сілія былі затрыманыя сіламі спецыяльнага прызначэння ЗША падчас начнога рэйду ў Каракасе (сталіца Венесуэлы). Паводле слоў прэзідэнта ЗША Дональда Трампа, аперацыя была дбайна спланаваная.

Падрабязнасці дзёрзкай вайсковай аперацыі ЗША апісвае выданне Daily Mail, спасылаючыся найперш на заявы амерыканскага лідара, шэраг іншых службовых асоб і крыніцы ў Цэнтральным разведвальным упраўленні ЗША. Вядома, што Мадура знаходзіўся ў добра ўмацаваным бункеры, які ахоўваўся як крэпасць і меў спецыяльны «бяспечны пакой» са сталёвымі дзвярыма таўшчынёй шэсць цаляў. Прэзідэнт Венесуэлы спрабаваў дабрацца да гэтага памяшкання, аднак амерыканскія вайскоўцы перашкодзілі яму.

«Ён (Мадура — рэд.) не здолеў зачыніць дзверы, бо нашы хлопцы былі занадта хуткімі. Ці засталі мы яго зненацку? Часткова — так, але яны штосьці чакалі. Супраціву было шмат. Было шмат страляніны», — расказаў Трамп.

Падрабязнасці аперацыі

Пасля некалькіх тыдняў падрыхтоўкі і чакання спрыяльных умоў надвор’я 2 студзеня ў 22:46 прэзідэнт ЗША ўхваліў аперацыю Absolute Resolve. За ходам рэйду прэзідэнт ЗША і яго дарадцы сачылі ў рэжыме рэальнага часу з ахоўнага пакоя ў рэзідэнцыі Мар-а-Лага (штат Фларыда, ЗША). Трамп заявіў, што назіраць за рэйдам у рэальным часе было «бліскуча».

«Я глядзеў на гэта літаральна як тэлешоу. Калі б вы бачылі гэтую хуткасць — гэта было неверагодна», — дадаў амерыканскі лідар.

У пачатку рэйду Каракас, сталіца Венесуэлы, застаўся без асвятлення. Паводле слоў амерыканскага прэзідэнта, сілы краіны валодаюць адпаведнымі тэхнічнымі магчымасцямі, аднак невядома, ішлося пра кібератаку ці ўмяшанне ў энергасістэму.

Паводле слоў генерала Дэна Кейна, да аперацыі былі прыцягнутыя падраздзяленні арміі, флоту, ВПС, марской пяхоты, сіл спецыяльных аперацый і разведвальных структур ЗША. У місіі ўдзельнічалі больш за 150 лятальных апаратаў, уключаючы знішчальнікі F-18, F-22, F-35, бамбардзіроўшчыкі B-1, верталёты Seahawk і Chinook і беспілотнікі, якія дзейнічалі з авіяносца Gerald R. Ford і іншых караблёў паблізу ўзбярэжжа Венесуэлы.

Спецназаўцы праніклі на тэрыторыю комплексу Мадуры, спусціўшыся з верталётаў. Там яны сутыкнуліся з інтэнсіўным узброеным супрацівам. Пасля перастрэлкі ў раёне Форт-Тыуна Мадуру і яго жонку затрымалі за лічаныя секунды. Падраздзяленні Delta Force (элітнае падраздзяленне спецыяльнага прызначэння амерыканскай арміі) былі гатовыя прарэзаць сталёвыя дзверы з дапамогай газавых рэзакоў, але гэтага не спатрэбілася.

Уся аперацыя доўжылася 2 гадзіны 28 хвілін, пры гэтым захапіць Мадуру ўдалося менш чым за паўгадзіны.

Затрыманых даставілі на борт USS Iwo Jima, дзе іх арыштавалі агенты ФБР Паўднёвай акругі Нью-Ёрка. Супраць Мадуры і яго жонкі абнародавалі абноўлены абвінаваўчы акт па абвінавачаннях у наркатэрарызме, кантрабандзе какаіну і незаконным захоўванні кулямётаў. Увечары суботы, 3 студзеня, іх перавезлі ў Нью-Ёрк для ўтрымання ў Metropolitan Detention Center.

Улады Венесуэлы пакуль не паведамілі пра дакладную колькасць ахвяр сярод вайскоўцаў або мірных жыхароў, аднак вядома прынамсі пра гібель адной жанчыны. Падчас аперацыі двое амерыканскіх вайскоўцаў атрымалі лёгкія агнястрэльныя раненні, адзін з верталётаў быў пашкоджаны, але змог вярнуцца на карабель. Дональд Трамп заявіў, што ЗША былі гатовыя да другой хвалі аперацыі, аднак пасля вынікаў рэйду патрэба ў ёй, паводле яго слоў, адпала.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com