Пра што сведчыць гісторыя жыхароў вёскі пад Рэчыцай, якія зябнуць
4- 7.01.2026, 15:57
- 12,006
Некалькі высноваў па гарачых слядах.
Гісторыя са зваротам жыхаркі вёскі Ведрыч Рэчыцкага раёна да Лукашэнкі атрымала працяг. Ала Прывалова, якая запісала драматычнае відэа пра тое, як яна і яе аднавяскоўцы зябнуць праз праблемы з ацяпленнем, выдаліла ролік і апублікавала новыя паведамленні, піша «Салідарнасць».
У свежых роліках жанчына ўжо не ў куртцы і шапцы. Яна распавядае, што ў вёску прыехалі правяральнікі з ЖКГ і рэдактар мясцовай раёнкі.
Паводле яе слоў, праверка цягнулася два дні. У яе кватэры выявілі праблему з ацяпленнем, якую ўжо нібыта ўхілілі без замены батарэй.
— Вядома, хутка зрэагавалі дзяўчаты. Малайцы, дзякуй ім вялікі. Хаця гэта можна было зрабіць і раней. Але генеральным дырэктарам ЖКГ быў іншы чалавек, які ўсё нібыта ператвараў у жарты, і нічога не рабілася, — падвяла Ала Прывалова вынік гісторыі, з якой напрошваецца некалькі высноваў.
Па-першае, такія сюжэты з сучаснага сельскага жыцця беларусаў сведчаць пра парушаную зваротную сувязь. Мясцовыя чыноўнікі з розных прычын ігнаруюць просьбы людзей вырашыць набалелыя праблемы — часам гадамі.
Гэта можа быць і банальная адсутнасць рэсурсаў, а часам і простае нежаданне ўнікаць у складанасці тых, хто цябе не выбіраў.
Па-другое, агалоска ў сацсетках усё яшчэ дзейнічае на чыноўнікаў. Магчыма, таму што сам Лукашэнка не раз паўтараў, што ведае, пра што беларусы «пішуць у TikTok’ах».
Праўда, гэта не адмяняе самога факта, што падобныя звароты простых грамадзян — вымушаная мера, сігнал адчаю. І чарговы раз падкрэсліваюць неэфектыўнасць (на мяжы марнасці) чыноўнікаў і таго, хто іх прызначае.
«Пацярпіце, гэты год будзе цяжкі, як і 30 папярэдніх»
І як бонус прапануем выбраныя моманты з каментарыяў пад ролікам жыхаркі вёскі Ведрыч, у якім яна дзякуе кіраўніцтву рэчыцкага ЖКГ:
«Горад Мазыр, зябнём 2 месяцы... У кватэры прахалодна, вось ніколі такога не было».
«Пацярпіце, гэты год будзе цяжкі, як і 30 папярэдніх. Выпіце чарку і закусіце».
«Пакажыце тэрмометр, бо апранутыя занадта цёпла. Магчыма, прымусілі запісаць абвяржэнне?».
«Яны самі спалохаліся пасля звароту, калі б не надалі агалоскі, дык так бы і спалі ў ватоўках».
«Так, працаваць хочуць, таму і аператыўна вырашылі пытанне».
«Добра, што не прымусілі прасіць прабачэння».
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас charter97@gmail.com
