Кіраўнік РПЦ прапанаваў лічыць расіян «здраднікамі Радзімы» за нязгоду з палітыкай рэжыму Пуціна

Патрыярх Кірыл зрабіў дзіўную заяву.

У Расіі павінен быць грамадскі кансенсус па самых галоўных пытаннях, а тых, хто не будзе згодны з прапанаванымі рашэннямі, варта лічыць «здраднікамі Радзімы», заявіў патрыярх Маскоўскі і ўсяе Русі Кірыл. «Ёсць паняцці, якія звязаныя з самай здольнасцю і магчымасцю існавання дзяржавы. Вось вакол гэтых ідэй, гэтых паняццяў абавязкова павінен быць грамадскі кансенсус. Калі хтосьці выпадае з гэтага кансенсусу, то ёсць такое вызначэнне — здраднік Радзімы з усімі вынікаючымі адсюль юрыдычнымі наступствамі», — сказаў кіраўнік Рускай праваслаўнай царквы (РПЦ) у калядным інтэрв’ю тэлеканалу «Расія 1» (цытата паводле ТАСС).

Паводле яго слоў, кансенсус патрэбны «вакол самых галоўных пытанняў нашай бяспекі». «Я маю на ўвазе не толькі бяспеку з пункту гледжання магчымых ваенных агрэсій, але і нашу духоўна-маральную бяспеку, то-бок захаванне нашых каштоўнасцяў, якія ў тым ліку ў значнай меры сфармаваныя традыцыйнымі рэлігіямі Расіі», — адзначыў патрыярх. Ён таксама заявіў, што Расія становіцца «духоўным праціўнікам заходняй цывілізацыі», паколькі на Захадзе «апраўдваюць грэх». Сярод праблем заходняй цывілізацыі кіраўнік РПЦ таксама назваў імкненне да асабістай свабоды, якое, на яго думку, вядзе да страты маральнай складовай і дэградацыі маладога пакалення.

Пры гэтым патрыярх лічыць, што менавіта Захад апалчыўся на Расію, паколькі яна з’яўляецца «вельмі прывабнай альтэрнатывай цывілізацыйнага развіцця». «Мы прапануем не выганяць хрысціянскую веру, як гэта цяпер адбываецца на Захадзе. Мы не прымаем тое, што сёння прынята на Захадзе пад лозунгам «правы чалавека», але што насамрэч накіравана на разбурэнне чалавечай маральнасці», — адзначыў кіраўнік РПЦ.

Акрамя таго, паводле яго слоў, на Захадзе на дадзены момант адсутнічае паняцце «подзвіг», якое прадугледжвае парушэнне камфорту. «Подзвіг здзяйсняецца дзеля чаго-небудзь, але не дзеля самога сябе. А вось гэтая засяроджанасць на самім сабе — гэта максімальны эгаізм, які сёння праяўляецца ў жыцці, у тым ліку і заходняга грамадства», — сказаў патрыярх. Ён дадаў, што без подзвігу, у тым ліку працоўнага, немагчыма абараняць і пабудаваць такую моцную краіну, як Расія. «Патрабуецца подзвіг», — падсумаваў кіраўнік РПЦ.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com