«Зняў з сябе 140 кляшчоў, далей лічыць паленаваўся»

У Беларусі ва ўсю моц дзейнічаюць кляшчы.

З прыходам цяпла ў Беларусі пачаўся сезон не толькі бярозавага соку і скураных куртак, але і кляшчоў. Прычым ёсць падставы меркаваць, што гэтай вясной яны могуць стаць яшчэ большым галаўным болем для адпачывальнікаў на прыродзе, чым раней: у лясах членістаногіх ужо заўважаюць цэлымі калоніямі, яны асабліва не хаваюцца і прагна ўгрызаюцца нават у красоўкі.

Адно відэасведчанне не для людзей са слабымі нервамі нядаўна падкінуў Threads.

- Вясна, прырода і кляшчы. Кляшчоў я столькі яшчэ не бачыў. Яны былі як уздоўж сцежкі, так і проста на траве амаль пры зямлі літаральна на кожным сантыметры глебы. Спачатку лічыў, колькі іх здымаю з сябе, лік спыніўся на 140 кляшчах, далей ужо паленаваўся. Усё ж такі пагаджуся з тымі, хто прадказваў усплёск кляшчоў пасля багатых снегападаў, нягледзячы на суровы мароз. Беражыце сябе і будзьце ўважлівыя, — напісаў аўтар, рыбак на імя Дзмітрый.

З «сваімі» кляшчамі Дзмітрый сутыкнуўся каля Аўгустоўскага канала пад Гроднам. У каментарыях беларусы пацвярджаюць: падобная карціна назіраецца і ў іншых частках краіны. Прапануюць прывезці напалм, на ўсякі выпадак аглядаюць сябе нават, будучы пад коўдрай, і запісваюцца на прышчэпкі.

Што кажа афіцыйная статыстыка па кляшчах?

З пачатку 2026 года ў Беларусі пакуль зафіксавана пяць выпадкаў укусаў. Пра гэта напрыканцы мінулага тыдня паведаміла прадстаўніца Рэспубліканскага цэнтра гігіены, эпідэміялогіі і грамадскага здароўя Улада Запольская.

Паводле яе слоў, сезон актыўнасці кляшчоў ужо пачаўся. З-за ўсталяванай цёплай пагоды кляшчы пачалі з'яўляцца ў лясах і парках. Вясной яны асабліва актыўныя і часцей нападаюць на людзей.

Спецыялісты нагадваюць пра меры засцярогі: пры наведванні прыроды рэкамендуецца надзяваць закрытае светлае адзенне, выкарыстоўваць галаўныя ўборы і сродкі ад насякомых. Пасля прагулак важна ўважліва аглядаць сябе.

Як абараніцца і што рабіць пры ўкусе?

Найбольш надзейным спосабам абароны застаецца вакцынацыя. Прышчэпкі даступныя як дзецям, так і дарослым. Іх бясплатна робяць людзям з груп рызыкі, напрыклад работнікам лясной гаспадаркі і вайскоўцам. Астатнія могуць прышчапіцца платна.

Калі кляшч усё ж укусіў, яго трэба як мага хутчэй выдаліць, апрацаваць месца ўкусу і цягам трох сутак звярнуцца да лекара для прафілактыкі магчымых інфекцый.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com