Двум каталіцкім святарам не працягнулі дазвол на служэнне ў Беларусі

Без пастыраў засталіся шэсць парафій у трох раёнах.

Беларусь вымушаныя пакінуць двое польскіх святароў, якія шмат гадоў служылі ў Брэсцкай вобласці. Як паведаміў праз дыяцэзіяльны сайт біскуп Пінскі Антоні Дзям’янка у сваім звароце да вернікаў, Пінская дыяцэзія не атрымала ад дзяржаўных уладаў узгаднення на далейшае служэнне святароў. 8 сакавіка з імі развіталіся ў парафіях, піша Katolik.news.

Не атрымалі дазволу на далейшую працу ксёндз Адам Страчынскі, які на працягу 11 гадоў быў душпастырам у Івацэвічах, Косаве і Вольцы, і ксёндз Павел Кручэк, які 13 гадоў служыў у Іванаве, Драгічыне і Бездзежы. Такім чынам, адразу шэсць парафій у трох раёнах (Драгічынскім, Іванаўскім і Івацэвіцкім) засталіся без святароў.

Ардынарый Антоні Дзям’янка адзначыў, што ў такіх умовах дыяцэзіі вельмі складана забяспечыць усе парафіяльныя супольнасці рэгулярнай душпастырскай апекай.

«Сёння мы перажываем такі перыяд, калі не стае мясцовых душпастыраў. Молімся аб пакліканнях да святарскага служэння і падтрымліваем нашых семінарыстаў. Шматгадовы настаяцель з’язджае з вашых парафій не па сваёй волі. Гэта боль для ўсіх нас. Але мы — біскупы і святары — будзем дапамагаць і падтрымліваць вас», — звярнуўся іерарх да вернікаў шасці парафій, якія засталіся без пастыраў.

Генеральны вікарый дыяцэзіі біскуп Андрэй Зноска таксама выказаўся на гэтую тэму. На сваёй старонцы ў інстаграме ён распавёў, што падчас візіту ў Гомель падзяліўся перажываннямі, звязанымі з выездам з Пінскай дыяцэзіі двух святароў, якім не ўзгаднілі дазвол на рэлігійную дзейнасць:

«Прымусовы ад’езд ксяндза Паўла з Іванава і ксяндза Адама з Івацэвіч — вялікая бяда для нашай дыяцэзіі, бо асірацелі і засталіся без пастырскай апекі вернікі ажно трох раёнаў, і што рабіць далей — не ведаю… Толькі малітва супольнасці Касцёла суцяшае ў смутку і дадае надзеі».

У Пінскай дыяцэзіі з-за вострага недахопу святароў многія ксяндзы вымушаныя абслугоўваць адразу некалькі парафій у розных, часта аддаленых населеных пунктах.

Адмова ў дазволе на працяг служэння двум святарам адбылася на фоне актыўнага супрацоўніцтва кіраўніцтва дыяцэзіі з мясцовымі дзяржаўнымі ўладамі, удзелу духавенства ў праўладных мерапрыемствах, нават з нагоды «Дня народнага адзінства» 17 верасня — далучэння Заходняй Беларусі да БССР, што мела катастрафічныя наступствы для Каталіцкага Касцёла ў гэтым рэгіёне.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com