«10-гадзінны працоўны дзень для медыкаў, да якога заклікае Лукашэнка, — гэта проста смешна»

Лекары ў Беларусі насамрэч працуюць значна больш.

Лекар, адзін з лідараў незалежнага прафсаюза медыкаў Станіслаў Салавей у экспрэс-каментарылі «Салідарнасці» расказаў пра папрокі дыктатара на адрас лекараў і сцверджанне пра «выратаванне» Мікалая Статкевіча.

3 красавіка на адкрыцці новай 42-й гарадской паліклінікі Мінска Аляксандр Лукашэнка заклікаў не наракаць на недахоп кадраў у медыцыне, а граматна выбудоўваць сістэму абслугоўвання насельніцтва. Кіраўнік настойліва параіў медыкам «не плакацца, што вы працуеце больш за 8 гадзін на суткі»:

— Медыкі — гэта як «прэзідэнт»: колькі трэба, столькі і працуем. А куды дзявацца? Таму церпіце там, дзе даводзіцца працаваць 10 гадзін. Вучыце новыя тэхналогіі, ушчыльняйцеся.

Акрамя таго, Лукашэнка ўзгадаў і былога палітвязня Мікалая Статкевіча, які пасля вызвалення адмовіўся з’ехаць з краіны:

— Паседзеў-паседзеў на мяжы на лаўцы і дадому вярнуўся. А не вярнуўся б — ужо б пахавалі. … Яго нядаўна ўратавалі — інсульт.

«Салідарнасць» спытала ў лекара і аднаго з лідараў незалежнага прафсаюза медыкаў Станіслава Салаўя, якім чынам трэба «ушчыльняцца» беларускім медыкам, што не так з сістэмай аказання медыцынскай дапамогі і што насамрэч прывяло Мікалая Статкевіча да інсульту.

— Глядзіце, я згодны з тым, што трэба граматна выбудоўваць сістэму. Ва ўсім свеце не хапае кадраў, увесь свет імкнецца зрабіць працу медыкаў максімальна эфектыўнай і карыснай для пацыента, каб гэта было зручна не сістэме, а менавіта пацыенту.

Напрыклад, візіты педыятраў на дом. Так, бывае, калі ў дзіцяці цяжкае захворванне, і такі візіт неабходны — я цяпер кажу не пра «хуткую дапамогу». Але калі ў дзіцяці, напрыклад, тэмпература 37,5, і бацькі выклікаюць лекара дадому, гэта насамрэч дрэнна.

Па некалькіх прычынах. У лекара, які прыходзіць, няма патрэбнай апаратуры, інструментаў і лекаў — усяго таго, што ёсць у паліклініцы, таму якасць дапамогі наўрад ці будзе высокай.

Далей усё роўна потым трэба будзе ісці з дзіцём у паліклініку, і наўрад ці ў лекара будзе больш чым 5 хвілін на такі прыём, бо ён пойдзе на чарговыя выклікі на дом і выдаткуе на гэта даволі шмат часу.

То-бок атрымліваецца, што пасля камфорту першага візіту лекара чалавек сутыкнецца з чэргамі і значным скарачэннем часу прыёму. А гэта значыць, што лекар можа не заўважыць нейкія важныя рэчы, што адаб’ецца, напрыклад, на эфектыўнасці лячэння. У выніку дрэнна абодвум — і лекару, і пацыенту.

Такая ж сітуацыя і з «хуткай дапамогай». Калі ў чалавека, напрыклад, высокі ціск, яму ўсё роўна трэба ехаць у бальніцу, каб атрымаць якаснае абследаванне і лячэнне. І, дарэчы, можна зрабіць бясплатнае таксі для чалавека ў бальніцу і з бальніцы — гэта будзе ў разы танней, чым выезд брыгады «хуткай дапамогі».

Што да гісторыі з Мікалаем Статкевічам, то гэта ўвогуле лухта. «Ён паседзеў на мяжы на лаўцы і дадому вярнуўся»? Ды ў яго ў турме забралі патрэбныя яму лекі і памянялі іх на іншыя, з іншым механізмам дзеяння, якія не дапамагалі.

Чаму гэта адбылося — я не ведаю. Але патлумачыць гэта з пункту гледжання лекара нейкімі разумнымі аргументамі немагчыма. Ну а турэмных лекараў увогуле ніхто не пытае — яны падпарадкоўваюцца начальніку турмы. І гэтым усё сказана.

У выніку Мікалай Статкевіч атрымаў інсульт. То-бок спачатку чалавека давялі да інсульту, а пасля ўратавалі, і апошняе ставяць сабе ў заслугу.

А словы наконт 10 гадзін працы медыкаў? Божа, ды калі б лекары падчас сваёй змены працавалі па 10 гадзін, паверце, яны ўсе былі б шчаслівыя. Яны часта працуюць па 32 гадзіны бесперапынна, па 60–80 гадзін на тыдзень замест 40 гадзін паводле працоўнага заканадаўства, на якое ніхто не звяртае ўвагі.

А гэта ўжо небяспечна, бо стомлены лекар, які не спаў суткі, можа дапусціць памылку, што можа быць смяротнай.

Таму 10-гадзінны працоўны дзень для беларускіх медыкаў, да якога заклікае Лукашэнка, — гэта проста смешна. Амаль усе лекары сёння перапрацоўваюць і працуюць больш, чым стандартны работнік у краіне. І яшчэ больш працаваць? Дык якая будзе эфектыўнасць ад такой працы?

Таму сістэму трэба аптымізаваць, але казаць «працуйце больш» — гэта ўжо ні ў якія вароты не лезе. Куды яшчэ больш?

Але каб нешта змяніць, трэба нармальна камунікаваць — і з медыкамі, і з пацыентамі. А ў нас як — цар добры, баяры дрэнныя. Сістэма добрая, краіна ўсё дала, а медыкі, маўляў, проста лянуцца працаваць. Але, як я ўжо сказаў, сітуацыя зусім іншая.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com