Чыноўнікі: Пасля ўшчыльнення жыць ва Уруччы стане яшчэ лепш

Мясцовыя ўлады і незадаволеныя ўшчыльненнем жыхары мікрараёна Уручча-2 так і не змаглі наладзіць дыялог.

Падчас апошняй сустрэчы з кіраўніком Першамайскага раёна Ігарам Кудрэвічам грамадзяне абвясцілі апошняму вотум недаверу і запатрабавалі яго адстаўкі. Мабыць, з таго часу чыноўнікі абралі іншую тактыку: афіцыйная кропка гледжання даносіцца да людзей пры дапамозе сайта адміністрацыі Першамайскага раёна, дзе на днях з'явіўся новы зварот да пратэстуючых, піша onliner.by.

«Паважаныя жыхары мікрараёна «Уручча- 2»! Вы жывеце ў выдатным месцы. Тут шмат зеляніны і чыстага паветра, развітая інфраструктура, нармальна працуе транспарт. Няма прамысловых прадпрыемстваў, а станцыя метро - у крокавай даступнасці, - гаворыцца ў паведамленні. - Але не трэба забываць, што некалькі тысяч сем'яў у Першамайскім раёне не маюць свайго жылля, доўгі час жывуць у інтэрнатах і мараць аб уласным доме. Новае будаўніцтва дазволіць людзям нармальна жыць, працаваць, гадаваць дзяцей і будаваць планы на будучыню. Наяўнасць жа ўсіх інжынерных сетак і камунікацый у сувязі з забудовай на ўжо раней заселенай тэрыторыі робіць новае жыллё адносна даступным па кошце, дае магчымасць у найкарацейшыя тэрміны завяршыць будаўніцтва і пазбавіцца ад нязручнасцей, звязаных з ім. Акрамя таго, плануемае разам з будаўніцтвам добраўпарадкаванне зялёнай зоны паміж МКАД і вул. Шугаева, дваровых тэрыторый, добраўпарадкаванне дадатковых парковачных месцаў зробіць гэты мікрараён яшчэ больш дагледжаным, добраўпарадкаваным і прыемным для жыцця».

Чыноўнікі адзначаюць: у раёне ўжо праводзіцца «вялікая праца па добраўпарадкаванню»: у дварах на вул. Русіянава і Шугаева абсталяваны дзіцячыя пляцоўкі, пафарбаваныя дэкаратыўныя агароджы, месцамі выкананы ямачны рамонт, плануецца будаўніцтва дадатковых парковачных месцаў. Разам з тым аўтары звароту запрашаюць усіх жыхароў мікрараёна выйсці на суботнікі, каб сумеснымі намаганнямі максімальна хутка стварыць спрыяльныя ўмовы для жыцця.

Сацыяльная інфраструктура раёна гатова да будаўніцтва новых дамоў і вытрымае дадатковую нагрузку, упэўненыя ў адміністрацыі:

«У бліжэйшы час пасля капітальнага рамонту адкрые свае дзверы для 220 дзяцей яслі-сад № 134 па вул. Шугаева, 13/3. Астатнія ўстановы адукацыі, якія дзейнічаюць у мікрараёне, таксама маюць усе ўмовы для арганізацыі навучальнага працэсу на належным узроўні. У мікрараёне «Усходні» у 2012 г. запланавана будаўніцтва дзіцячага саду, у 2013 г. - яшчэ аднаго, што здыме нагрузку з дашкольных устаноў ва «Уруччы-2», а будаўніцтва ў 2013 годзе ў мікрараёне «Усходні» паліклінікі зробіць ва Уруччы больш даступным медыцынскае абслугоўванне».

Нагадаем, жыхары Уручча выступаюць супраць ушчыльнення забудовы мікрараёна і будаўніцтва шасці новых дамоў, два з якіх будуць прызначаныя для спецназаўцаў. Нягледзячы на іх пратэсты, будоўля ўжо пачалася.