Месца «прынцэсы» цырка заняў чыноўнік з Менгарвыканкама
48- 10.06.2013, 17:03
- 114,507
Былому дырэктару Белдзяржцырка Таццяне Бандарчук хутка знайшлі замену.
У мінулую пятніцу стала вядома, што ў дачыненні да дырэктара Белдзяржцырка Таццяны Бандарчук, якая ўзначальвала яго амаль 20 гадоў, распачатая крымінальная справа. Прайшлі выходныя, а падрабязнасці скандалу ў галоўным цырку краіны па-ранейшаму не агучваюцца.
Як стала вядома «Салідарнасці», выконваючым абавязкі дырэктара цырка ўжо прызначаны намеснік начальніка ўпраўлення культуры Менгарвыканкама Сяргей Мядзведзеў. Такім чынам, «прынцэса цырка» (так называюць Бандарчук з тых часоў, як яна выступала на арэне з унікальным трукам: круціла абруч, стоячы ў пуантах, як балерына, на далоньцы партнёра) ўсё ж такі звольненая.
У прыёмнай дырэктара гаварыць на тэму лёсу былой начальніцы адмаўляюцца.
- Пакуль ідзе разбіральніцтва мы ніякіх каментароў не даем, - прагучала на іншым канцы провада. - На гэты перыяд з упраўлення культуры прызначаны выконваючы абавязкі дырэктара Сяргей Мядзведзеў. У астатнім - ніякіх зменаў.
Сын Таццяны Бандарчук працягвае працаваць на пасадзе галоўнага рэжысёра цырка.
- Прабачце, калі ласка, я вельмі люблю журналістаў, але ў дадзены момант не буду нічога каментаваць, - сказаў Серж Бандарчук. - Мы чакаем, пакуль усё высветліцца. Тады і будзем адказваць на пытанні.
Таццяна Бандарчук, якая з'яўляецца дырэктарам Белдзяржцырка з 1996 года, у канцы мінулага тыдня запэўнівала, што аб узбуджэнні крымінальнай справы яе яшчэ не паставілі ў вядомасць - пасля праверак Дзяржкантролю яна выйшла на бальнічны.
Як паведамілі ў аддзеле інфармацыі і сувязі з грамадскасцю Следчага камітэта Беларусі, згодна з атрыманымі матэрыяламі крымінальнай справы, былы кіраўнік установы падазраецца ў злоўжыванні службовымі паўнамоцтвамі (ч. 3 арт.424 КК). Што канкрэтна ставіцца ў віну былому дырэктару, пакуль не паведамляецца.
Следчы камітэт прыняў крымінальную справу да вытворчасці. Мера стрымання ў дачыненні да падазронай не абіралася. Ёй пагражае ад 3 да 10 гадоў пазбаўлення волі з канфіскацыяй (альбо без) маёмасці.
Нешта падобнае ў сваім яркім цыркавым жыцці Таццяна Бандарчук ужо перажывала.
У красавіку 2000 года прэс-служба МУС распаўсюдзіла паведамленне такога зместу:
«Супрацоўнікі УЭП ГУУС Менскага гарвыканкама ў будынку Беларускага дзяржцырка затрымалі з доказамі злачынства дырэктара гэтай установы Таццяну Бандарчук. Яна падазраецца ў атрыманні хабару ў суме 4,9 тысячы даляраў ЗША ад двух артыстаў Маскоўскага цырка за вырашэнне пытання наконт заключэння кантракта, звязанага з выступленнем і размяшчэннем цыркавога рэквізіту. Узбуджаная крымінальная справа па ч. 2 арт. 169 КК».
Затрыманую змясцілі ў СІЗА, а па сталіцы папаўзлі жудасныя чуткі, аж да таго, што ў сейфе дырэктаркі знайшлі пачкі даляраў, а ў самім Белдзяржцырку нібыта чачэнскія баевікі сваю базу арганізавалі.
Пакуль Таццяна Мікалаеўна знаходзілася пад арыштам, у цырка з'явіўся новы дырэктар. Прозвішча яго запомніць не паспелі, казалі, што з былых вайскоўцаў. Камандаваў ён артыстамі нядоўга.
Прыкладна праз месяц Бандарчук вызвалілі са следчага ізалятара.