Міністр ЖКГ: Мы далі дастаткова часу для прыватызацыі жылля

Міністр жыллёва-камунальнай гаспадаркі Андрэй Шарэц лічыць, што за год рэальна назбіраць 300 мільёнаў на прыватызацыю кватэры.

Андрэй Шарэц у інтэрв'ю «Народной Газете», пракаментаваў адну самых папулярных тэм гэтага лета - перавод непрыватызаванага жылля ў разрад арэнднага.

Па словах міністра, праект указу Лукашэнкі, які прадугледжвае змяненне складу дзяржаўнага жыллёвага фонду, ужо гатовы і накіраваны ва ўрад. Ён завершыць этап прыватызацыі жылых памяшканняў дзяржаўнага жыллёвага фонду.

«Пры прыватызацыі жылых памяшканняў дзяржаўнага жыллёвага фонду грамадзяне змогуць выкарыстоўваць імянныя прыватызацыйныя чэкі «Жыллё», - распавёў Андрэй Шарэц. - У цяперашні час уладальнікамі спецыяльных (чэкавых) рахункаў з'яўляюцца каля 188 тысяч чалавек, што складае 3,5 адсотка ад агульнай колькасці грамадзян, якім першапачаткова была налічаная жыллёвая квота.

Варта адзначыць, што праект пасля яго выдання ўступіць у сілу праз чатыры месяцы, і на працягу аднаго года пасля ўступлення яго ў сілу ў грамадзян будзе час для таго, каб звярнуцца з заявай аб прыватызацыі жылога памяшкання. Такім чынам, устанаўліваюцца тэрміны, дастатковыя для ліквідацыі прычын і ўрэгулявання праблемных сітуацый, якія не дазваляюць грамадзянам прыняць узгодненае рашэнне аб прыватызацыі жылога памяшкання».

Нагадаем, у Беларусі амаль 400 тысяч кватэр (каля 15% ад усяго жылога фонду) знаходзяцца ў дзяржуласнасці. 17 траўня міністр жыллёва-камунальнай гаспадаркі Андрэй Шарэц заявіў, што непрыватызаванае грамадзянамі жыллё будуць пераводзіць у камерцыйнае, пасля чаго беларусы сталі ў вялізныя чэргі ў выканкамы. Нават чыноўнікі ўпэўненыя, што прыняць такую колькасць людзей за год тэхнічна немагчыма.

У сярэднім прыватызацыя жылля ў Менску абыдзецца ў Br300 мільёнаў.