Сацыяльныя сеткі возьмуць пад кантроль

Лукашэнкаўскія ідэолагі настойваюць на заканадаўчай рэгламентацыі паводзінаў у сацсетках.

Размова пра гэта ішла сёння падчас анлайн-канферэнцыі на сайце БелТА.

У ёй прымалі ўдзел галоўны рэдактар часопіса «Беларуская думка» Вадзім Гігін, намеснік дырэктара Інфармацыйна-аналітычнага цэнтра пры адміністрацыі Лукашэнкі Аляксей Мацавіла, прэс-сакратар ГУУС Менгарвыканкама Аляксандр Ластоўскі і прэс-сакратар Міністэрства па надзвычайных сітуацыях Віталь Навіцкі.

Удзельнікі дыскусіі абмяркоўвалі сацыяльныя сеткі і іх ўплыў на грамадскае жыццё. У прыватнасці, Гігін выказаў меркаванне, што ў Беларусі наспела неабходнасць увядзення агульных правілаў карыстання сацыяльнымі сеткамі.

«Прыйшоў такі час, што заканадаўча або не заканадаўча, але нам трэба ўводзіць нейкія правілы карыстання. Яны павінны ўлічваць некалькі момантаў. Першае - вызначэнне, што такое сацыяльныя сеткі. Праграміст ведае, чым сайт адрозніваецца ад акаўнта, але як гэта заканадаўча аформлена? Другі момант, правілы паводзін розных узроставых і сацыяльных катэгорый у Інтэрнэце і сацыяльных сетках», - сказаў Гігін і прывёў у прыклад правілы паводзінаў у сацыяльных сетках, якія распрацоўваюць некаторыя карпарацыі для сваіх супрацоўнікаў, падкрэсліўшы, што «відавочна, прыйшоў час дамаўляцца аб агульных правілах ў краіне».

Трэцім момантам лукашэнкаўскі прапагандыст назваў заканадаўчую адказнасць.

«Я не кажу, што ў дадзеным выпадку трэба пераглядаць наш закон аб СМІ і іншыя заканадаўчыя акты, якія рэгулююць распаўсюджванне інфармацыі, але трэба ўвесці адказнасць за інфармацыю, якая размешчаная ў сацыяльных сетках», - падкрэсліў ён, адзначыўшы, што ёсць судовыя прэцэдэнты, якія ў тым ліку датычацца інфармацыі, якая дыскрэдытуе дзелавую рэпутацыю, з'яўляецца ўварваннем ў асабістае жыццё.

На думку Гігіна, сацыяльныя сеткі аблічбавалі і вынеслі ў Інтэрнэт тое, што раней пісалі на плоце - плёткі, але калі ў чуткі мала верылі, то, па выніках аднаго з расейскіх апытанняў, таму, што пішуць блогеры, давяраюць 8% грамадзян.

«Гэта дзяржава і закон, гэта карпаратыўныя правілы, сямейныя правілы. Напэўна, сямейныя правілы ўжо дзейнічаюць, калі дзіцяці ў сям'і абмяжоўваюць у доступе да тых ці іншых крыніц інфармацыі», - сказаў ён.

Яго словы падтрымаў іншы ўдзельнік анлайн-канферэнцыі - намеснік дырэктара Інфармацыйна-аналітычнага цэнтра Аляксей Мацавіла.

«Мадэрацыя кантэнту - жыццёвая неабходнасць. У нейкай ступені гэта павінна быць прадметам заканадаўчага рэгулявання, у нейкай - прадметам самарэгулявання супольнасці ўладальнікаў сайта, інтэрнэт-карыстальнікаў. Але сам прынцып мадэрацыі кантэнту разумным людзям відавочны», - упэўнены ён.

Ідэя з рэгуляваннем сацыяльных сетак прывядзе да яшчэ большага кантролю за нязгоднымі з дзеяннямі рэжыму. Пра гэта ў інтэрв'ю сайту charter97.org заявіў журналіст і былы палітвязень Анджэй Пачобут.

«Калі беларускія ўлады бяруцца за рэгуляванне чаго-небудзь, то, як правіла, гэта вядзе да новых рэпрэсій і спробаў абмежаваць свабоду слова. Зразумела, што пэўныя праблемы, звязаныя з адказнасцю карыстальнікаў сацыяльных сетак за тое, што яны пішуць, ёсць. Але калі за яе рашэнне бяруцца ўлады, то з гэтага вынікаюць толькі палітычныя пераследы, ціск і абмежаванні. Таму нічога добрага ад падобных ініцыятыў чакаць не варта. Яны накіраваныя на абмежаванне дыскусій у інтэрнэце, бо толькі пакуль яшчэ ёсць магчымасць свабодна абмяркоўваць палітычныя пытанні. У звычайных СМІ гэта ўжо немагчыма. Зразумела, што ўлады такія дыскусіі прайграюць, таму яны і спрабуюць іх «рэгуляваць», - сказаў ён.

Нагадаем, Лукашэнка неаднаразова казаў пра пагрозу, якую ўяўляе інтэрнэт для яго ўлады. У якасці прыкладу ён прыводзіў падзеі «арабскай вясны», у якіх сацыяльныя сеткі згулялі велізарную ролю.