У Гомелі даішнікі адкрылі агонь па п'янаму бяспраўніку на BMW

У Гомелі п'янага кіроўцу BMW затрымлівалі з дапамогай стрэлаў і АМАПа.

Пра начную пагоню ў Валатаве паведаміў onliner.by чытач. Паводле яго слоў, ён бачыў, як некалькі міліцэйскіх машын гналіся па вуліцы Свірыдава за BMW 7, а калі аўтамабілі зніклі з поля зроку, налічыў прыкладна 6 стрэлаў.

У абласной ДАІ расказалі пра некаторыя падрабязнасці начнога інцыдэнту. Каля 2:00 з Веткаўскага РАУС паступіла паведамленне, што ў бок Гомеля рухаецца аўтамабіль з кіроўцам без правоў, магчыма, п'яным. Экіпаж Дзяржаўтаінспекцыі заўважыў парушальніка ў раёне вуліцы Лепяшынскага, пачаў пераслед. Да аперацыі па затрыманні далучыліся яшчэ 7 аўтамабіляў іншых падраздзяленняў, у тым ліку АМАП і «Ахова».

На сірэны, маячкі і каманды па гучнай сувязі кіроўца не рэагаваў. Прыйшоўшы да высновы, што яго дзеянні пагражаюць бяспецы навакольных, міліцыянты адкрылі агонь - спачатку папераджальны, потым па машыне.

На вуліцы Каменшчыкава у раёне Прудкоўскага рынку BMW урэзаўся ў агароджу, кіроўца быў затрыманы.

Вядома, што яму 25 гадоў, ад агляду на ўтрыманне алкаголю ў крыві ён адмовіўся. Пасведчання кіроўцы не мае: быў пазбаўлены за п'янае кіраванне.

Па папярэдніх дадзеных, у машыне затрыманага знойдзены «прадмет, падобны на глушыцель для наразной зброі».