Падазраваныя ў смерці двух жыхароў Менска ад спайсу прызналі віну
13- 13.10.2014, 16:52
- 18,376
Падазраваныя ў смерці двух юнакоў, якія атруціліся 10 кастрычніка спайсам у Менску, падчас допытаў далі прызнальныя паказанні.
Раніцай 10 кастрычніка ў пакоі інтэрната на вуліцы Казінца ў Кастрычніцкім раёне сталіцы былі знойдзены трупы двух хлопцаў, жыхароў гэтага інтэрната. Было ўстаноўлена, што напярэдадні вечарам хлопцы праз інтэрнэт набылі курыльную сумесь. Забраўшы спайс з тайніка ў Першамайскім раёне, прывезлі яго ў інтэрнат, дзе і ўжылі, нагадвае БелаПАН.
Датычны да продажу спайсу жыхар Светлагорска затрыманы на месцы жыхарства, яго сталічны калега - ля пад'езда дома №23 на вуліцы Янкі Маўра (разам са сваёй дзяўчынай ён выходзіў з кватэры знаёмага).
Як паведамілі ў Следчым камітэце Беларусі, устаноўленая роля кожнага ўдзельніка злачыннай групы.
Так, хлопец 1993 года нараджэння набываў рэагенты, вёў перапіску з пакупнікамі, атрымліваў ад іх грашовыя сродкі на электронныя кашалькі, паведамляў каардынаты закладак спайсу. У часе ператрусу ў яго дома канфіскаваная гатоўка, банкаўскія карткі, ноўтбук і мабільны тэлефон.
Другі ўдзельнік 1992 нараджэння, які пражываў апошнім часам у Менску, вырабляў курыльныя сумесі, ірабіў закладкі. Пры асабістым даглядзе ў яго канфіскаваныя 5 пакетаў па 5 грамаў кожны з курыцельнымі сумесямі, якія змяшчаюць псіхатропныя кампаненты. Дома выяўлена абсталяванне для вырабу спайсу (электронныя шалі, рэспіратар, пакуначкі для расфасоўкі), раслінная аснова (аптэчныя ўпакоўкі з маці-і-мачахай і мятай), электронныя сродкі сувязі, якія змяшчаюць інфармацыю аб дачыненні падазраванага да злачыннай дзейнасці.
Паводле высновы экспэртаў, курыльныя сумесі, канфіскаваныя ў затрыманага, утрымліваюць асабліва небяспечнае псіхатропнае рэчыва. Цяпер развязваецца пытанне аб ужыванні ў дачыненні да падазраваных меры стрымання.