Як простаму беларусу купіць кватэру?
48- 12.11.2014, 10:42
- 38,172
Апошнія тры гады беларусы практычна былі пазбаўленыя магчымасці ўзяць крэдыт на жыллё - адсоткавыя стаўкі пачынаючы з 2011-га шалёныя.
А тым часам многія шчаслівыя ўладальнікі кватэры паспелі вырасці з набытай калісьці жылплошчы. Асабліва калі жылплошча гэтая была аднапакаёвай. Згадзіцеся, у стандартнай аднапакаёўцы сям'я з трох чалавек можа змяшчацца толькі да таго часу, пакуль малы не падрасце. А значыць, бацькам пара думаць аб пакупцы большай кватэры. «Комсомольская правда в Беларуси» пастанавіла пралічыць, якія ў беларускіх сем'яў ёсць варыянты купіць двухпакаёвую або трохпакаёвую кватэру замест стандартнай аднапакаёвай. Мы разглядалі толькі тых, хто не можа разлічваць на льготны крэдыт (а такіх у нашай краіне сёння большасць), і знайшлі рэальныя спосабы палепшыць жыллёвыя ўмовы.
ВАРЫЯНТ №1
Купіць кватэру ў растэрміноўку
Сёння некаторыя забудоўшчыкі прапануюць купіць кватэру ў растэрміноўку - унесці частку грошай за жыллё адразу, а астатнія выплачваць кожны месяц цягам года. Каб набыць па такой схеме прыстойную двушку (75 кв. м), спатрэбіцца блізу 120 тысяч даляраў. Уявім, што сям'я з трох чалавек (дзіця плюс двое працоўных з бацькоў) прадае сваю аднапакаёўку за 60 тысяч даляраў і ўкладвае гэтую суму ў куплю новай кватэры. У гэтым выпадку цягам года ім давядзецца выплаціць тыя 60 тысяч, што засталіся, гэта значыць кожны месяц трэба будзе аддаваць за кватэру па 5 тысячаў даляраў.
Да штомесячных расходаў сям'і прыйдзецца дадаць яшчэ і суму, якую яна будзе марнаваць на здымнае жыллё (свая кватэра ўжо прададзеная, а новая яшчэ не пабудаваная). Акрамя таго, цягам года бацькі павінны назапасіць на рамонт, без якога ў новую кватэру не заедзеш.
ВАРЫЯНТ №2
Крэдыт у дзяржбанку: зарабляць трэба 22 мільёны ў месяц!
На другасным рынку добрую двушку або невялікую траячку можна знайсці за 90 тысяч даляраў. У гэтым выпадку да атрыманай пры продажы аднапакаёвай кватэры $60 тысячам трэба дадаць 30 тысяч. Калі за гады сямейнага жыцця такую суму назапасіць не атрымалася, можна ўзяць крэдыт у банку.
Сёння дзяржаўныя банкі прапаноўваюць крэдыты не толькі для ільготнікаў, шматдзетных сем'яў і жыхароў сельскай мясцовасці. Усе астатнія таксама могуць пазычыць грошы на куплю нерухомасці. Праўда, стаўкі крэдытаў будуць значна вышэйшыя. Сёння гэта 35% гадавых. Калі зберацеся ўзяць пад такі адсотак для куплі кватэры 30 тысяч даляраў (дакладней, 315 мільёнаў беларускіх рублёў), трэба будзе падаць у банк даведкі аб заробку або сукупным даходзе аж на 22 325 000 рублёў у месяц!
Крэдыт на такіх умовах выдадуць тэрмінам да 15 гадоў, і плаціць па ім прыйдзецца больш за 11 мільёнаў у месяц. Прычым на пагашэнне асноўнага доўгу з гэтай сумы будзе сыходзіць усяго 1 875 000, усе астатнія гэта - гэта аплата высокіх адсоткаў.
ВАРЫЯНТ №3
Крэдыт у банку: адсотак ніжэйшы, кватэра ў заклад
Некалькі камерцыйных банкаў таксама выдаюць крэдыты на жыллё, і стаўкі іх могуць быць нават ніжэйшыя, чым у дзяржбанках. Адна з самых выгадных прапаноў на сённяшні дзень робіць Белгазпрамбанк: крэдыты «Новабудоўля» (на будаўніцтва кватэр) і «Навасельцы» (на куплю кватэры) выдаюцца на 15 гадоў пад 30% гадавых.
Прычым стаўка крэдытаў прывязаная да стаўкі рэфінансавання Нацыянальнага банка (крэдыт выдаецца пад стаўку рэфінансавання плюс 10 адсоткавых пунктаў). Са зніжэннем стаўкі рэфінансавання адсоткі ў абавязку могуць паступова зніжацца.
Каб узяць у крэдыт 315 мільёнаў рублёў на абмен аднапакаёвай кватэры, кліент Белгазпрамбанка павінен зарабляць 15 мільёнаў рублёў. Даход банк можа ўлічваць сукупны, напрыклад, два заробкі - мужа і жонкі. Кватэра, набытая па праграмах «Навасельцы» і «Новабудоўля», з'яўляецца закладнай маёмасцю.
Дарэчы, у выпадку неабходнасці Белгазпрамбанк можа даць на год адтэрміноўку па выплаце асноўнай пазыкі.
РАЗАМ
Вядома, стаўкі па крэдытах на нерухомасць ўсё яшчэ застаюцца высокімі, і ўзяць крэдыт на куплю кватэры (не маючы на руках хоць бы за палову неабходнай сумы) па-ранейшаму праблематычна. Але адсоткі крэдытаў сёння адчувальна знізіліся, і з'явілася магчымасць пазычыць у банка грошы на даплату ў тым выпадку, калі вялікая частка неабходнай сумы ў вас ужо ёсць. Вядома, можна і далей чакаць, спадзеючыся, што эканамічная сітуацыя зменіцца і стаўкі крэдытаў будуць паніжаныя. Аднак стоадсоткавай гарантыі няма, а кватэрнае пытанне вырашаць многім трэба менавіта цяпер.