Пуцін ухваліў продаж Кітаю ЗРК С-400

Абмяркоўваецца пастаўка Кітаю ад двух да чатырох установак.

Па звестках крыніц "Коммерсанта", бакі яшчэ вядуць перамовы па колькасці сістэм і іх кошце. Але робіцца гэта з асабістага адабрэння Уладзіміра Пуціна. Рашэнне прэзідэнта было прынята ў пачатку 2014 года і "з існуючымі нязгодамі з ЗША і краінамі Еўропы з-за ўваходжання Крыма ў склад Расеі ніяк не звязана", адзначае крыніца ў Крамлі.

Упершыню пра жаданне Кітая набыць устаноўкі С-400 неафіцыйна паведамлялася ў 2011 годзе. Аднак расейскі Генштаб і Федэральная служба бяспекі (ФСБ) накладвалі на рэалізацыю здзелкі вета, сцвярджаючы, што спачатку яны самі павінны атрымаць на ўзбраенне дастатковую колькасць С-400.

У цяперашні час вытворца сістэмы канцэрн "Алмаз-Антэй" ужо пачаў пастаўляць першыя палкавыя камплекты С-400 у расейскія войскі, да 2020 года іх павінна быць 28 штук. Кітайскія ж узброеныя сілы змогуць атрымаць комплексы не раней 2016 года. Акрамя таго, Міністэрства абароны Расеі вядзе працы па стварэнні больш дасканалай ракетнай сістэмы пятага пакалення С-500, піша NEWSru.com.

Па дадзеных крыніц, асноўным жаданнем заказчыка з'яўляецца атрыманне поўнай інфармацыі аб тактыка-тэхнічных характарыстыках новага комплексу. Раней у ФСБ асцерагаліся, што ў Кітаі маюць намер выкарыстоўваць тэхнічныя элементы сістэмы для стварэння на іх аснове ўласных распрацовак. Аднак цяпер паміж Расеяй і Кітаем дзейнічае пагадненне па правах інтэлектуальнай уласнасці ў сферы гандлю зброяй, якое гэтага зрабіць не дазволіць.

Ракетная сістэма С-400 "Трыумф" прызначаная для паражэння ўсіх сучасных сродкаў паветрана-касмічнага нападу, у тым ліку самалётаў і балістычных ракет. Паражэнне мэты магчыма на вышыні ад пяці метраў да 30 кіламетраў.

Набыццё сістэмы С-400 дазволіць КНР не толькі кантраляваць уласную паветраную прастору, але і прастору над Тайванем і астравамі Сянкаку/Дзяоюйдао, якія з'яўляюцца прадметам тэрытарыяльнай спрэчкі Кітая з Японіяй.

КНР праяўляе стабільную цікавасць да расейскіх узбраенняў, уваходзячы на працягу апошніх гадоў у пяцёрку найбуйнейшых экспарцёраў. У мінулым годзе Пекін набыў расейскіх узбраенняў і ваеннай тэхнікі на суму больш за 1,8 млрд даляраў. Па кантракце ад 2007 года кітайскія ўзброеныя сілы атрымалі 15 дывізіёнаў С-300ПМУ2 і чатыры сістэмы кіравання СУ 83М6Е2, якія былі пастаўленыя для аховы найбуйнейшых гарадоў.