Foreign Policy: Пуцін памыляецца, як Гітлер

Прэзідэнт Расеі стаў чарговай ахвярай класічнай грубай гістарычнай памылкі.

Амерыканскі часопіс Foreign Policy апублікаваў аналітычны матэрыял, у якім прадказвае Уладзіміру Пуціну правал на ўсходзе Украіны і ў цэлым у сусветнай палітыцы.

«Ад Напалеона да Буша ёсць добры прэцэдэнт, чаму гэта дрэнная ідэя для Расеі - уварвацца ва Усходнюю Украіну»», - цытуе артыкул у часопісе НР.

Аўтар артыкула сцвярджае, што прывід уварвання Расеі бачны ўсё больш на фоне хаосу і анархіі ва Усходняй Украіне. Пры гэтым, на яго думку, Пуцін глыбока пралічыўся.

«Гэта, як і анэксія Расеяй Крыма, аказваецца дарагім. У адзіночку Пуцін паставіў эканоміку Расеі ў небяспеку, атрымаў міжнародную пагарду, падазронасць і сорам. Разбудзіў Еўропу ад яе стратэгічнай комы, адрадзіў НАТА, павялічыў замежную канкурэнцыю для аднаго з нешматлікіх тавараў, якія Расея можа вырабляць і прадаваць, - прыродны газ. Калі Пуцін думаў, захапіўшы Крым, прымусіць астатнюю частку Усходняй Еўропы шанаваць Маскву, адбываецца нешта зусім супрацьлеглае - антырасейскія, праНАТАўскія скокі настрояў ва ўсім рэгіёне», - гаворыцца ў артыкуле.

На гэтым фоне аўтар заўважае, што ёсць усе прыкметы таго, што Пуцін «ідзе па слядах большасці ганебных памылак у гісторыі, і рысы прыняцця рашэнняў з'яўляюцца адначасова знаёмымі і злавеснымі».

«Лідары, якія робяць вялікія стратэгічныя памылкі, часта пакутуюць ад празмернай ганарыстасці, - піша выданне. - Абодва - Напалеон у 1812 годзе і Гітлер у 1941 годзе - атрымалі шэраг вырашальных баявых перамог, якія далі ім пачуццё непераможнасці. Абодва, вядома, уварваліся ў Расею і страцілі велізарныя арміі. Пагарда Пуціна не грунтуецца на шэрагу ваенных перамог, аднак, ён ведае, як запалохаць суседзяў Расеі. Ён заняў дзве правінцыі Грузіі, учыніў кібервойны супраць Эстоніі, пагражаў Польшчы ядзернымі ракетамі, маніпуляваў залежнасцю кліентаў ад расейскага газу, імкнуўся справакаваць хваляванні сярод рускіх меншасцяў у іншых краінах. Ён, здаецца, думае, што захоп Крыма з'яўляецца вялікім поспехам... Такі неабгрунтаваны давер аказваецца класічным кагнітыўным недахопам...».

Яшчэ адным доказам памылкі напышлівай і, магчыма, фатальнай палітыкі Пуціна з'яўляецца апраўданне метадаў атрыманнем прыбытку ў будучыні. Напрыклад, той жа Адольф Гітлер «імкнуўся атрымаць вялізную прастору на Усходзе для жыцця немцаў, што прывяло да ўварвання ў Савецкі Саюз». У выніку такое памылковае імкненне «прывяло не толькі да паразы, але і ў канчатковым выніку да гібелі вінаватага».

«Няўмелыя лідары таксама звычайна недаацэньваюць волю, здольнасці і магчымасці сваіх праціўнікаў, а таксама аператыўныя цяжкасці іх сіл. Такім чынам, яны ўпэўненыя, што поспех прыйдзе хутка, - піша часопіс. - Спіс амаль бясконцы: Напалеон недаацаніў расейскую тактыку ў 1812 годзе... Германскі генеральны штаб цалкам недаацэньваў амерыканскую волю і здольнасць у 1917 годзе... Гітлер думаў, што гнілая Савецкая дзяржава абрынецца, калі ён проста «ўдарыць нагамі ў дзверы». Кітай уварваўся ў В'етнам у 1979 годзе, чакаючы хуткага поспеху, ігнаруючы той факт, што в'етнамцы перажылі і перамаглі Францыю і Злучаныя Штаты ў папярэднія дзесяцігоддзі... Злучаныя Штаты ў 2003 годзе пралічыліся з працягласцю і коштам акупацыі Ірака. Пуцін жа здольны да недаацэнкі адказу Захаду (ці ўнутраных партызан) пры ўварванні ва Украіну».

Нягледзячы на тое, што Украіна можа не дачакацца ваеннай дапамогі з боку Захаду, Пуцін можа напароцца, на думку заходніх журналістаў, на «нетрадыцыйную вайну, якая нагадвае тую, пры якой афганцы ваявалі супраць савецкіх акупантаў». Акрамя гэтага, ўварванне ва Украіну будзе стымуляваць заходнія выдаткі на абарону, чаму Расея з яе значна меншай эканомікай не зможа адпавядаць.