Паплечнік Януковіча Цароў настойвае на выкананні патрабаванняў Пуціна

Палітык прапанаваў перанесці выбары на восень 2014 года.

Кандыдат у прэзідэнты Украіны Алег Цароў лічыць, што ў гэтым выпадку пратэстныя рухі на паўднёвым усходзе Украіны могуць спыніцца. Пра гэта ён заявіў на прэс-канферэнцыі 8 красавіка, піша «Корреспондент».

«Трэба спачатку змяніць канстытуцыю, вырашыць пытанне з мовамі, з паўнамоцтвамі рэгіёнаў і толькі потым праводзіць выбары. Калі мы цяпер возьмемся за справу, да восені мы маглі б правесці выбары. Я ўпэўнены, што калі сёння аб'явіць аб гэтым паўднёваму ўсходу, усе пратэсты спыняцца», - сказаў ён.

Цароў таксама падкрэсліў, што лічыць не зусім законнымі выбары, прызначаныя на 25 траўня, але не будзе здымаць кандыдатуру і будзе ў іх удзельнічаць. Ён таксама адзначыў, што гатовы на працягу некалькіх дзён вылецець ва ўсходнія рэгіёны, каб дапамагчы ўрэгуляваць сітуацыю.

Перанос прэзідэнцкіх выбараў прысутнічае сярод умоў, вылучаных ўладамі Расеі, якія ўжо атрымалі неафіцыйнае найменне «ўкраінскі план Пуціна».

Нагадаем, 6 красавіка ў Луганску, Харкаве і Данецку агрэсіўныя малойчыкі з прарасейскімі лозунгамі здзейснілі спробы захапіць органы дзяржаўнай улады.

У прыватнасці, 6-7 красавіка ў Харкаве сепаратысты захапілі АГА, разграмілі тэлекампанію АТН, жорстка збівалі ўдзельнікаў мітынгу за адзінства Украіны. Паколькі мясцовая міліцыя практычна не перашкаджала гэтым бясчынствам, 7 красавіка ў Данецкую, Луганскую і Харкаўскую вобласці прыбылі спецпадраздзяленні міліцыі з іншых рэгіёнаў Украіны. Сёння ноччу спецпадраздзяленне "Ягуар" без стрэлаў і ахвяраў вызваліла Харкаўскую абласную дзяржаўную адміністрацыю ад сепаратыстаў. Затрыманыя 70 парушальнікаў, якія адпраўленыя ў кіеўскія і палтаўскія СІЗА.