Уладзімір Сямашка: Глыбіня датацый у сельскую гаспадарку склала 49%

Беларусь з'яўляецца безумоўным лідарам па ўзроўні датацый сельскай гаспадаркі.

Гэта даў зразумець першы віцэ-прэм'ер Уладзімір Сямашка, запатрабаваўшы ад сяла павышэння эфектыўнасці вытворчасці. Па яго разліках глыбіня толькі фінансавых датацый складае 49%, піша АФН.

«Возьмем суадносіны паміж прамысловасцю і сельскай гаспадаркай па падатках, што паступаюць у бюджэт, - адлічэнні гэтых вектараў эканомікі несувымерныя. Па-другое, паліва для сельгаспрадпрыемстваў адпускаецца па коштах, якія значна ніжэй, чым для іншых галін. Па-трэцяе, нягледзячы на тое, што фонд падтрымкі сельскагаспадарчага вытворцы быў ліквідаваны, аб'ёмы дадатковага фінансавання з бюджэту захаваліся. Гэтыя тры пазіцыі і даюць сумарна глыбіню датацый у 49%», - заявіў Сямашка.

«А ёсць яшчэ і іншыя віды падтрымкі. Напрыклад, калійныя ўгнаенні прадавалі аграрыям па кошце, які больш чым у 20 разоў ніжэй, чым на сусветных рынках», - прызнаў першы віцэ-прэм'ер.

Сямашка таксама канстатаваў, што па дзяржпраграме адраджэння вёскі непасрэдна ў галіну і сельскую інфраструктуру, у тым ліку і ў абнаўленне машынна-трактарнага парку было ўкладзена $37 млрд.

Спасылаючыся на вопыт развітых замежных краін, Сямашка сцвярджае, што не выступае за поўную ліквідацыю датацый вёсцы, але чакае ад яе адэкватнай аддачы.

«У мэтах забеспячэння харчовай бяспекі дзяржава абавязаная падтрымліваць сельскую гаспадарку. Гэта, дарэчы, робяць багатыя і высокаразвітыя краіны свету: ЗША, ФРГ, Канада і іншыя (памер датацый разлічваецца на гектар угоддзяў або на адзінку ўраджаю). Угнаенні за мяжой таксама субсідзіруюць. Таму не варта думаць, што нашу сельскую гаспадарку трэба пазбавіць датацый. Ні ў якім разе. Сутнасць праблемы ў тым, што ўзровень падтрымкі ў развітых краінах складае 18-20%, а ў нас як мінімум 49%», - падкрэсліў першы віцэ-прэм'ер.

«У выніку дзяржава напружвае іншыя галіны, у прыватнасці прамысловасць, і за кошт іх субсідуе сельскую гаспадарку. Я лічу, што варта дзяржаве мець адэкватную аддачу ад АПК», - рэзюмаваў Сямашка.