Севярынец вярнуўся ў Пружаны з кнігай
4- 4.06.2014, 12:50
- 5,133
У Пружанах адбылася прэзентацыя кнігі былога палітвязня Паўла Севярынца «Беларуская глыбіня».
Каля 30 пружанцаў прыйшлі на сустрэчу з сустаршынёй БХД Паўлам Севярынцам, які прадставіў сваю кнігу, напісаную «на хіміі» ў спецкамендатуры Купліна каля Пружанаў. Нямала прысутных апынуліся героямі кнігі і атрымалі яе ў падарунак, перадае «Радыё Свабода».
Сустрэча праходзіла ў прыватным доме актывістаў ТБМ. Як распавёў Павел Севярынец, спачатку мерапрыемства планавалі правесці ў музеі, але там атрымалі адмову. Таму не змаглі пабываць на прэзентацыі жыхары суседніх Бярозы і Івацэвічаў - месца было мала.
Падчас прэзентацыі Павел Севярынец распавёў, чым адрознівалася адбыванне ім пакарання ў Малым Сітне на поўначы Беларусі і ў пружанскім Купліне.
«У Пружанах жывая вера. Тут больш веры, тут больш беларускай мовы, тут усё больш светлае... Гэта адчуванне святла давала больш творчага натхнення», - сказаў былы палітвязень.
Кніга «Беларуская глыбіня», распавёў Павал Севярынец, выйшла невялікім тыражом у 250 асобнікаў, але яшчэ будзе дадрукоўвацца. Палітык распавёў, што з распаўсюджваннем праз афіцыйныя друкарні ёсць цяжкасці, таму прасцей купіць кнігу будзе менчукам.
Пасля прэзентацыі ў Пружанах Павел Севярынец заехаў у спецкамендатуру ў Купліне, для бібліятэкі якой таксама падарыў некалькі асобнікаў сваёй кнігі.
Пад час прэзідэнцкіх выбараў 2010 года Павел Севярынец быў актывістам штаба кандыдата ў прэзідэнты Віталя Рымашэўскага. Быў арыштаваны пасля акцыі пратэсту супраць фальсіфікацыі вынікаў выбараў. Абвінавачаны ў арганізацыі «масавых беспарадкаў» і ўдзеле ў іх. Пазней справу перакваліфікавалі на «арганізацыю і падрыхтоўку дзеянняў, якія груба парушаюць грамадскі парадак, альбо актыўны ўдзел у іх».
16 траўня 2011 суддзя Заводскага суда Менска Жанна Брысіна асудзіла Севярынца на 3 гады так званай «хіміі» - абмежавання волі з накіраваннем ва ўстанову адкрытага тыпу. Трохгадовае пакаранне адбываў у спецкамендатуры Куплін каля Пружанаў.
На «хіміі» Севярынец і напісаў сваю кнігу, яна складаецца з эсэ пра беларускую глыбінку, гісторый, людзей Пружаншчыны і Брэстчыны.