На даху царквы XVI стагоддзя ў Заслаўі чарапіцу замянілі металапрофілем
19- 17.08.2014, 10:53
- 14,669
У Заслаўі доўжыцца рамонт Спаса-Праабражэнскай царквы - былога пратэстанцкага кальвінскага збору.
Карэспандэнт «Салідарнасці» стаў сведкам таго, як вяліся гэтыя працы.
На даху царквы старую чарапіцу замянілі металапрофілем. І дэмантаж старога даху, і кладка новага праводзілася рабочымі без касак і страховак. Адна з касак зрэшты, ляжала на лаве каля царквы.
На тэрыторыі замчышча ў вялікай колькасці кладзецца тратуарная плітка. Ранейшыя вузкія дарожкі сталі шырэйшыя ў разы. Бетонную лесвіцу літаральна «ўрэзалі» у культурны пласт. Праўда, якасць кладкі выклікае пэўныя пытанні. «Хвалі» няроўнасцяў прыкметныя няўзброеным вокам.
А вось чаго на месцы работ не ўбачыш, дык гэта пашпарта аб'екта. А гэта, як распавёў старшыня Добраахвотнага таварыства аховы помнікаў гісторыі і культуры Антон Астаповіч, з'яўляецца парушэннем закона. Царква і прылеглая тэрыторыя знаходзяцца пад абаронай закона аб ахове гісторыка-культурнай спадчыны і ў выпадку якіх-небудзь рамонтных работ пашпарт аб'екта - абавязковы.
Рэканструкцыя царквы ў Заслаўі адобраная Міністэрствам культуры.