Міліцыянты знішчылі тону канопляў у Хоцімску

Праваахоўнікі знішчылі ў Хоцімску блізу 900 кг дзікарослых канопляў.

Пра гэта паведамілі ў аддзяленні інфармацыі і грамадскіх сувязей УУС Магілёўскага аблвыканкама, піша БелТА.

Расліны, якія ўтрымліваюць псіхаактыўныя рэчывы, былі выяўленыя паблізу ракі Бесядзь па вуліцы Інтэрнацыянальнай Хоцімска падчас правядзення спецыяльнай праграмы «Мак». Каноплі раслі на плошчы 1,1 га. Усе расліны знішчаныя.

З пачатку працы спецпраграмы «Мак» (з 1 чэрвеня) у Магілёўскай вобласці выяўлена і знішчана 16 тыс 894 кг канопляў, а таксама больш за 1 тыс кг расліны маку на агульнай плошчы амаль 90 кв. км. Складзена 320 пратаколаў аб адміністрацыйных правапарушэннях паводле ст.16.1 КаАП РБ (пасеў або вырошчванне забароненых да апрацоўкі раслін і грыбоў, якія змяшчаюць наркатычныя сродкі і псіхатропныя рэчывы), якая прадугледжвае штрафныя санкцыі ў суме да 20 базавых велічынь.