Латвія пачала старшынстваваць у Радзе ЕЗ
- 1.01.2015, 12:12
- 6,327
Латвія з 1 студзеня 2015 года стала краінай-старшынёй Рады Еўразвязу.
Сваімі прыярытэтамі ў гэтым статусе ў Рызе ўважаюць павышэнне канкурэнтаздольнасці ЕЗ, развіццё адзінага еўрапейскага рынку і ўмацаванне інфармацыйнага грамадства, паведамляе РІА «Новости».
Дзяржава-старшыня Рады Еўразвязу выбіраецца з сябраў ЕЗ у парадку ратацыі. Прэм'ер-міністр дзяржавы-старшыні на шэсць месяцаў становіцца старшынёй Рады ЕЗ. Латвія, якая з'яўляецца сябрам ЕЗ з 2004 года, упершыню ўзначаліла Раду Еўразвязу, пераняўшы эстафету ў Італіі.
Латвія, як старшыня Рады ЕЗ, збіраецца спрыяць развіццю стасункаў з постсавецкімі дзяржавамі ў фармаце «Усходняга партнёрства». «Мы выкарыстоўваем індывідуальны падыход да кожнага сябра «Усходняга партнёрства». Мы павінны бачыць сур'ёзнае супрацоўніцтва, якое ахоплівае палітычны дыялог, вяршэнства права і шэраг іншых пытанняў», - паведаміў журналістам кіраўнік МЗС Латвіі Эдгар Рынкевіч>.
З ягоных слоў, краіна будзе стымуляваць ЕЗ аказаць падтрымку ў імплементацыі пагадненняў аб асацыяцыі і зоне свабоднага гандлю з краінамі, якія ўваходзяць у «Усходняе партнёрства», а таксама спрыяць аблягчэнню візавага рэжыму ў дачыненні да асобных краін.
Кіраўнік МЗС адзначаў, што саміт «Усходняга партнёрства», які пройдзе ў Рызе ў траўні, павінен даць выразны сігнал пра цікавасць ЕЗ што да далейшага развіцця праграмы.