Дональд Туск: Наплыў уцекачоў у ЕЗ - элемент гібрыднай вайны

Уцекачы сталі элементам палітычнай канфрантацыі і часцяком у руках і розуме некаторых палітыкаў казырнай картай.

Кіраўнік Еўрапейскай рады Дональд Туск увечары 2 кастрычніка на цырымоніі закрыцця Еўрапейскага форуму новых ідэй у Сопаце заявіў, што «сёння аб тым, хто трапляе ў Еўропу - палітычны ўцякач, эканамічны мігрант ці ж чалавек, які едзе сюды з дрэннымі намерамі, пастанову прымаем не мы ў Еўропе, а часцей за ўсё - кантрабандысты, унутраная сіла людзей і надвор'е на Міжземным моры», паведамляе «Радыё Польшча».

Туск падкрэсліў, што для таго, каб прадухіліць «драматычныя палітычныя, арганізацыйныя, а таксама ментальныя змены ў Еўропе», трэба задумацца аб абароне еўрапейскіх межаў. «Я кажу пра патрэбу вяртання сабе кантролю над вонкавымі межамі ЕЗ. Не для таго, каб перагарадзіць шлях палітычным уцекачам, а затым, каб вярнуць сабе адчуванне палітычнай супольнасці», - адзначыў кіраўнік Еўрапейскай рады.

Ён таксама звярнуў увагу на тое, што ўпершыню ў еўрапейскіх сталіцах гаворыцца пра тое, што шэнгенская зона не прайшла праверкі. «З'яўляюцца, пакуль што ў галіне спрэчак і дыскусій, сцены ўнутры Еўропы», - сказаў Туск. «Гэтыя сцены, сімвалічна падзяляюць Еўропу, або тыя, якія, можа быць, з'явяцца на шэнгенскіх межах або ў нашай ментальнасці, ствараюцца таксама таму, што многія еўрапейцы не ўпэўненыя ў сваёй будучыні, бачаць хаос на межах, бачаць, што еўрапейскія лідары часта выглядаюць бездапаможнымі перад тварам хвалі ўцекачоў», - адзначыў палітык.

Туск падкрэсліў, што ён не згодны «з песімістычным тонам у дыскусіі аб стане Еўропы сёння». «Сотні тысяч, а неўзабаве - я баюся - мільёны ўцекачоў, беспамылкова паказваюць гэты пункт на сусветнай карце. Найбольш талерантная, якая гарантуе пэўныя стандарты, свабоду. Гэта менавіта Еўропа», - сказаў кіраўнік Еўрапейскай рады.

На яго думку, «уцекачы сталі элементам палітычнай канфрантацыі і часам - у руках і розуме некаторых палітыкаў - казырнай картай і нават элементам чарговай фазы гібрыднай вайны, першыя праявы якой мы назіралі ў Крыме і Данбасе».