Яўген Ліпковіч: Новы падатак пойдзе на ўтрыманне АМАПу і падарожжы Колі

Беларусь - першая краіна ў свеце, якая ўвяла для грамадзян плату за пражыванне на сваёй тэрыторыі.

Аляксандр Лукашэнка 2 красавіка падпісаў Дэкрэт №3 "Аб папярэджанні сацыяльнага ўтрыманства". Дакументам устанаўліваецца абавязак грамадзян Беларусі, замежных грамадзян, якія стала пражываюць у нашай краіне, і асоб без грамадзянства, якія не ўдзельнічалі ў фінансаванні дзяржаўных расходаў або ўдзельнічалі ў такім фінансаванні менш за 183 каляндарныя дні ў мінулым годзе, па выплаце збору ў памеры 20 базавых адзінак.

Дэкрэт уваходзіць у дзеянне пасля яго афіцыйнага апублікавання і будзе прымяняцца да адносін, якія ўзніклі з 1 студзеня 2015.

"Гэта не збор на дармаедства, гэта плата на ўтрыманне Шчоткінай, Ананіч, прэзідэнцкага самалёта, Беллегпрама, Белкаапсаюза, селектарных нарад, АМАПу, падарожжаў Колі і іншага", - мяркуе вядомы беларускі блогер Яўген Ліпковіч.

Ён адзначае, што збор будуць плаціць не толькі непрацуючыя, але і тыя, у каго выходзіць менш за 20 базавых адзінак падаходнага падатку ў год.

"Фактычна Беларусь - першая краіна ў свеце, якая ўвяла для грамадзян плату за пражыванне на сваёй тэрыторыі", - падкрэсліў блогер.