Мішэль Плаціні абвясціў аб вылучэнні на пасаду прэзідэнта FIFA

Кіраўнік Звязу еўрапейскіх футбольных асацыяцый (UEFA) Мішэль Плаціні абвясціў аб намеры балатавацца на пасаду прэзідэнта FIFA.

"Я прыняў глыбока асабістую і вельмі абдуманую пастанову, старанна ўзважыўшы і будучыню футбола, і сваю ўласную будучыню. Зразумела, пры гэтым я кіраваўся і вашай падтрымкай, той павагай і падбадзёрваннем, якое выказвалі мне многія з вас", - цытуе Мішэля Плаціні прэс-служба UEFA.

Выбары прэзідэнта FIFA намечаныя на 26 лютага 2016 года. Кандыдаты павінны падаць заяўкі на ўдзел у выбарах да 26 кастрычніка, паведамляе расейская служба BBC.

Плаціні цягам многіх гадоў разглядаўся ў якасці пераемніка цяперашняга кіраўніка FIFA Зэпа Блатэра.

У канцы траўня ў FIFA разгарэўся карупцыйны скандал, у выніку якога ад дзейнасці былі адхіленыя некалькі чыноўнікаў арганізацыі.

Кіраўнік FIFA Зэп Блатэр, на фоне скандалу пераабраны на пяты тэрмін, заявіў аб пастанове пакінуць займаны пост.

Мішэль Плаціні ўзначаліў UEFA ў 2007 годзе. Будучы футбалістам, Плаціні тройчы прызнаваўся найлепшым гульцом Еўропы.

Пасля заканчэння кар'еры футбаліста Плаціні цягам некалькіх гадоў трэніраваў нацыянальную каманду Францыі.