У Горадні будуць судзіць актывістаў, якія сталі на абарону экалогіі (Фота)

13 лістапада адбудзецца суд над гарадзенскімі грамадскімі актывістамі, якія 16 кастрычніка намагаліся перашкодзіць супрацоўнікам зялянгаса знішчаць зялёныя насаджэнні.

Тая спроба скончылася складаннем пратакола, паводле якога міліцыянты абвінавачваюць трох жыхароў горада ў здзяйсненні дробнага хуліганства і непадпарадкаванні законным патрабаванням, паведамляе “Радыё Рацыя”. Зараз грамадзкія актывісты ўжо атрымалі позвы ў суд.

Падчас добраўпарадкавання горада на завулку Тэлеграфным краязнаўца Ігар Лапеха, моладзевая актывістка Надзея Крапівіна і супольнік руху “За свабоду” Эдвард Дмухоўскі сталі на абарону дрэваў, якія паводле пастановы гарвыканкама падлягалі зліквідаванню. Свае захады гарадзенцы абгрунтавалі незаконнымі дзеяннямі мясцовых уладаў: зліквідаванне дрэваў ажыццяўлялася ў сувязі з тым, што лісце нібы “забівала стокі вады на даху будынка”, у якім знаходзіцца каледж жыллёва-камунальнай гаспадаркі.

На думку Ігара Лапехі, радыкальныя дзеянні па абароне дрэваў выкліканыя ў першую чаргу абыякавасьцю мясцовых уладаў, якія не звяртаюць увагі на грамадскую думку.

Між тым, пазазаконныя дзеянні мясцовых уладаў па знішчэнні дрэваў у Гародні - факт, які падцвердзіў камітэт прыродных рэсурсаў.Камунальныя службы горада атрымалі прадпісанне, згодна з якім іх дзеянні па знішчэнню дрэваў з’яўляюцца парушэннем прыродаахоўнага заканадаўства, паводле якога выдаленне аб’ектаў расліннага свету абавязкова ўзгадняецца з насельніцтвам.