Магілёўскія ўлады супраць помніка ахвярам Халакоста
- 1.07.2008, 13:56
З просьбай дазволіць усталёўку памятнага знака на месцы масавай гібелі ахвяраў Халакоста ўжо ў чацвёрты раз звярнулася да гарадскіх уладаў Габрэйская абшчына Магілёва.
Як паведамілі прадстаўнікі абшчыны, адпаведны ліст накіраваны ў тапанімічную камісію пры Магілёўскім гарвыканкаме 30 чэрвеня. У ім адзначаецца, што ў кастрычніку 2008 года спаўняецца 65 гадоў з часу знішчэння Менскага гета — аднаго з найбуйнейшых у Еўропе, піша БелаПАН.
"Гэтая дата стала адзіным Днём памяці ахвяраў Халакоста ў Беларусі і паслужыла адпраўной кропкай для арганізацыі памятных мерапрыемстваў, якія будуць праводзіцца не толькі ў Менску, але і па ўсёй краіне. Сярод асноўных мерапрыемстваў — усталёўка помнікаў і памятных знакаў на месцы масавай гібелі ахвяраў Халакоста ў гарадах і раёнах Беларусі, у тым ліку і ўсталёўка памятнага знака на месцы былога габрэйскага гета ў Магілёве", — гаворыцца ў лісце.
Па меркаванні яго аўтараў, такі памятны знак "будзе спрыяць захаванню гістарычнай спадчыны горада, а таксама выхаванню маладога пакалення ў духу інтэрнацыяналізма і патрыятызма".
Памятны знак будзе ўяўляць сабой камень-валун 1,7х2,0 метра, усталяваны на бетонавы пастамент. На ім будзе размешчаны надпіс на расейскай мове і іўрыце "У памяць аб габрэях Магілёва — ахвярах нацызму", а таксама шматлікія малюнкі адбіткаў далоняў — дзіцячых, жаночых, мужчынскіх.
Ідэя памятнага знака ўхваленая не толькі сябрамі магілёўскіх габрэйскіх абшчын і выхадцаў з Магілёва, якія цяпер пражываюць за мяжой, але і шырокай гарадской грамадскасцю.
Магілёўскае габрэйскае гета было створанае ў верасні 1941 года. Праіснавала нядоўга: ужо да сярэдзіны кастрычніка 1941 года практычна ўсё габрэйскае насельніцтва Магілёва і наваколляў — не менш за 10,5 тыс. мірных жыхароў — было расстраляна. Пасля гэтага ў рэгіёне засталося меней тысячы габрэяў — працоўных-спецыялістаў. Яны жылі ў адмыслова створаным працоўным лагеры, які размяшчаўся на тэрыторыі заводу імя Дзімітрава (цяпер — завод "Строммашына"). Пасля амаль усе гэтыя людзі былі забітыя.